Ironianëselanik,rama:sherrmejhanejemestymittëqofteve VMRO-DPMNE kërkon dorëheqjen e Kryeministrit Dimitar Kovaçevski
Ironia e Kryeministrit shqiptar Edi Rama në Selanik, ku homologun Maqedonas e prezantoi si të Bullgarisë Perëndimore, është marrë seriozisht dhe ka shkaktuar reagime të shumta në vendin fqinj. Për të sqaruar gjithçka, Kryeministri Rama ka ndarë një video në “Twitter” me Kryeministrin maqedonas, Dimitar Kovaçevski dhe Kancelarin gjerman, Olaf Scholz, gjatë shtrëngimit të duarve në Selanik, nën shoqërinë e Kryeministrit grek, Kyriakos Mitsotakis dhe Presidenten e Kosovës, Vjosa Osmani. Duke iu përgjigjur reagimeve në Maqedoni, veçanërisht të opozitës së fqinjëve tanë, Rama shprehet se është për të qeshur dhe qarë histeria e disa personave në Shkup. Në mesazhin që shoqëronte videon, Rama thekson se ai ironizoi bllokadën e shëmtuar ndaj Maqedonisë së Veriut nga ana e Bullgarisë në lidhje me integrimin në BE. Kryeministri shqiptar e ka cilësuar si një sherr mejhaneje mes tymit të qofteve, shprehje e përdorur shpesh prej tij në shumë reagime për çështje të ndryshme brenda vendit. “Për të qeshur dhe qarë histeria e disave në Shkup ndaj Kryeministrit Kovaçevski, pas publikimit të videos së duarshtrëngimeve me Kancelarin Scholz në Selanik, ku ironizova bllokadën e shëmtuar ndaj Maqedonisë së Veriut nga ana e Bullgarisë! Sherr mejhaneje mes tymit të qofteve”, shkruan Kryeministri Rama në “Twitter”. Në videon e publikuar nga Kryeministri Edi Rama, shihet që Kryeministri grek Mitsotakis i prezanton Kancelarit gjerman, Olaf Scholz, Kryeministrin Edi Rama dhe Kryeministrin e Maqedonisë së Veriut, Dimitar Kovaçevski. Në këtë moment, kreu i qeverisë shqiptare ndërhyn me humor, duke i thënë Kancelarit gjerman se Kovaçevski është Kryeministri i Bullgarisë Perëndimore, veprim i cili u prit me shaka dhe të qeshura nga të gjithë të pranishmit. Kancelari gjerman, Olaf
Scholz, mori pjesë në darkën e punës së liderëve të shteteve të Europës Juglindore, që u organizua në Greqi të premten. Duke u ndalur te komunikimi i tij me liderët e Ballkanit Perëndimor, Kancelari ka veçuar një foto me Kryeministrin Edi Rama në fokus, për të treguar rëndësinë e këtij takimi. Mbi foton e postuar në “Instagram”, Kancelari shkruan: “Jam i kënaqur që mund të shkëmbej mendime me këta krerë shtetesh dhe qeverish. Sepse vetëm së bashku, ne jemi më të fortë!”.
REAGIMET NË MAQEDONINË E VERIUT
Në Maqedoni, e para që ka reaguar pas ironisë së Ramës, i cili e prezantoi atë si Kryeministër të Bullgarisë Perëndimore, ishte partia më e madhe opozitare. VMRO-DPMNE ka kërkuar dorëheqjen Kryeministrit maqedonas, Dimitar Kovaçevski, pasi sipas saj, ai aprovoi atë që tha Rama dhe nuk reagoi në mbrojtje të vendit të tij. “Jo vetëm poshtëruese fjalët me të cilat Maqedonia u turpërua dhe u ofendua në një takim ndërkombëtar para liderëve ballkanikë dhe Kancelarit gjerman, por edhe më shumë që Kovaçevski e ndoqi të gjithën me të qeshura dhe miratim të papërshtatshëm. Dje, kur u prezantua si Kryeministër i Bullgarisë së ardhshme perëndimore, Kovaçevski po të kishte një gram dinjitet, do të reagonte në mbrojtje të vendit të tij, të cilin e përfaqëson dhe për të cilin merr rrogë nga qytetarët, dhe të qeshë e të gëzohet. Çfarë ka për të qeshur dhe për t’u gëzuar, zoti Kovaçevski?”, pyeti Misajlovski.