Kosova shënoi 23-vjetorin e hyrjes së trupave të KFOR-IT
Osmani e Kurti kërkojnë drejtësi për krimet serbe Nga lufta e viteve 1998-’99 janë vrarë më shumë se 13,000 persona
Kosova ka shënuar 23-vjetorin e hyrjes së trupave të NATOS në Kosovë. Më 12 qershor 1999, trupat e para të misionit të NATO-S (KFOR) u futën në territorin e Kosovës, duke i dhënë kështu fund një lufte gati dyvjeçare.
Një varg aktivitetesh u zhvilluan në Kosovë, përfshirë homazhe te varrezat e dëshmorëve, si dhe ceremoni të tjera, në të cilat morën pjesë zyrtarët e shtetit të Kosovës. Në Bllacë, pikën kufitare mes Kosovës dhe Maqedonisë së Veriut, Presidentja e Kosovës, Vjosa Osmani, tha se futja e trupave të NATO-S në Kosovë i kishte dhënë fund vrasjes dhe dëbimit të shqiptarëve. Ajo tha se Kosova ka ndërtuar miqësi me SHBA-NË dhe shtetet anëtare të NATO-S, të cilat kontribuuan në çlirimin dhe bërjen shtet të Kosovës. “Kosova ka bërë hapa përmbajtjesorë drejt së ardhmes euroatlantike. Duke qenë një shtet i dominuar nga rinia, përpjekja jonë e vazhdueshme është që Kosovën ta shndërrojmë në vend ku ata e krijojnë dhe kanë perspektivën e tyre. Këtë po e bëjmë çdo ditë, potenciali i rinisë kosovare është i jashtëzakonshëm, andaj atyre duhet t’u jepet dhe t’u krijohet mundësia”, theksoi Presidentja Osmani. Ndërkohë, Kryeministri i Kosovës, Albin Kurti, tha se qeveria e Kosovës po punon në adresimin e së kaluarës dhe krimeve të kryera nga Serbia në Kosovë. Në aktivitet ishte edhe ambasadori amerikan në Kosovë, Jeffrey Hovenier, i cili pas ceremonisë që u zhvillua në Bllacë të Hanit të Elezit, shkroi në “Twitter” se trupat e KFOR-IT sollën paqen në Kosovë. “I nderuar që festova sot Ditën e Paqes në kufirin e Maqedonisë së Veriut dhe Kosovës, përkrah zyrtarëve të Kosovës dhe anëtarëve të komunitetit diplomatik. 23 vjet më parë këtu, shumë kosovarë u kthyen në shtëpi. NATO solli stabilitet dhe
“Kosova ka bërë hapa përmbajtjesorë drejt së ardhmes euroatlantike. Duke qenë një shtet i dominuar nga rinia, përpjekja jonë e vazhdueshme është që Kosovën ta shndërrojmë në vend ku ata e krijojnë dhe kanë perspektivën e tyre. Këtë po e bëjmë çdo ditë, potenciali i rinisë kosovare është i jashtëzakonshëm, andaj atyre duhet t’u jepet dhe t’u krijohet mundësia”
prosperitet për Kosovën dhe rajonin”, shkroi Hovenier në “Twitter”. 23 vjet më parë, më 12 qershor 1999, forcat e NATO-S hynë në Kosovë. Bombardimet e NATO-S kundër Serbisë zgjatën 78 ditë. Pas sulmeve ajrore, bombardimet u ndërprenë më 10 qershor 1999, me miratimin e Rezolutës 1244 të
Këshillit të Sigurimit të Kombeve të Bashkuara dhe trupat serbe u tërhoqën nga Kosova.
PRITJA E PAQERUAJTËSVE NGA QYTETARËT E KOSOVËS
Me lule e me fytyra të buzëqeshura dhe me parulla ku shkruhej “NATO”, qytetarë të shumtë të Kosovës
pritën trupat e parë paqeruajtës të NATO-S, që hynë në Kosovë 23 vjet më parë. Dymbëdhjetë qershori në Kosovë shënohet si Dita e Lirisë apo Çlirimit të Kosovës. Trupat paqeruajtëse të NATO-S hynë në Kosovë pas fushatës ajrore të Aleancës së Veriatlantikut kundër forcave serbe në Kosovë dhe Serbi, që
zgjati 78 ditë. Bombardimet u ndërprenë më 10 qershor 1999, pas miratimit të Rezolutës 1244 të Këshillit të Sigurimit të Kombeve të Bashkuara. Rezoluta ishte kompromis i pesë anëtareve të përhershme të Këshillit të Sigurimit. Në bazë të Rezolutës, në Kosovë u vendos administrata e përkohshme e OKB-SË (UNMIK) për të administruar vendin e shkatërruar nga lufta, për një periudhë tranzitore deri në ngritjen e kapaciteteve vendore dhe zgjidhjen e statusit të Kosovës. Një ditë para hyrjes së trupave paqeruajtëse, u nënshkrua Marrëveshja Teknike e Kumanovës, që parashihte tërheqjen e të gjitha forcave serbe nga Kosova dhe hyrjen e trupave ndërkombëtare të NATO-S në Kosovë. Tërheqja e plotë e trupave serbe përfundoi më 20 qershor 1999. Ushtarët e parë që u futën brenda territorit të Kosovës më 1999 ishin pjesëtarë të ushtrisë norvegjeze. Ata ishin rreth 50,000 forca paqeruajtëse nga 36 vende të botës prej të cilëve 30,000 ishin të shteteve të NATO-S - që erdhën në Kosovë. Me hyrjen e trupave ndërkombëtare, u mundësua kthimi në shtëpitë e tyre i mbi 800,000 refugjatëve, persona të zhvendosur brenda dhe jashtë Kosovës. Nga lufta e viteve 1998-’99 janë vrarë më shumë se 13,000 persona dhe janë më shumë se 6,000 të pagjetur. Qindra shqiptarë të vrarë nga Kosova janë gjetur në varreza masive në Serbi. Trupat e tyre thuhet se janë bartur nga forcat serbe me qëllim që të fshehin krimet. Sipas të dhënave, mbi 1,600 persona konsiderohen ende të pagjetur. Njëzetetre vjet pas hyrjes në Kosovë, numri i trupave të KFOR-IT është zvogëluar dhe aktualisht në vend janë mbi 3,700 trupa nga 28 shtete të botës.