“Jeni në moment kritik”, Kim: Vendosni, krimi e oligarkët apo qytetarët?
“Mjaft më me korrupsion. Ne ju shtyjmë në rrugën e duhur” “Shqipërinë e bllokon korrupsioni”, ambasadorja: Duhet më shumë punë. Nëse dikush thyen ligjin, do të paguajë çmimin
Ambasadorja e SHBA-SË, Yuri Kim, i kërkon qeverisë që të intensifikojë hapat ndaj luftës antikorrupsion. Ajo apeloi për goditje të fortë ndaj të korruptuarve, duke bërë të qartë se luftën antikorrupsion nuk mund ta bëjë SHBA.
Sipas saj, Shqipëria është një vend në lulëzim, por ajo çfarë e pengon është korrupsioni. Gjatë konferencës së parë antikorrupsion, Yuri Kim përmendi se SHBA-JA do të jetë gjithmonë një shtysë për Shqipërinë në realizimin e kësaj sfide. “Tani ja ku jemi, 31 vite nga fundi i komunizmit, 100 vite qëkur u vendosën lidhjet me SHBA-NË. Një vend që e ka ekonominë në lulëzim, kur erdha këtu e ndjeva energjinë dhe është frymëzuese. Ky vend ka aftësi për më tepër, por çfarë e bllokon? Korrupsioni. Këtu duhet të marrësh e të japësh ryshfet, në mënyrë që të tregosh talentin. Ky është thelbi i korrupsionit. Lufta kundër korrupsionit është një çështje e rëndësishme për këtë vend, që shteti të jetë i pavarur e i pasur. Ne duam që Shqipëria të jetë gjithmonë e më shumë një partner. Ne flasim për rolin e SHBA-VE dhe dëgjoj që më thonë vetëm ju mund ta bëni këtë. Por, unë mund të them se vetëm ju mund ta bëni, SHBA do të jetë me ju në çdo hap. Ndonjëherë do ju shtyjmë ne, do jeni të lodhur e nuk do të mund të vazhdoni, por ne do të jemi aty. Kemi folur për faktin se në 100 vite ju keni kaluar shumë gjëra, jeni anëtarë të NATO-S, jeni në prag të Be-së, keni bërë gjithë punën e nevojshme për të qenë anëtarë”, u shpreh ambasadorja e SHBA-VE.
“Do ju duhet që të kaloni në një nivel tjetër, por nuk mund ta bëni nëse keni korrupsion. Edhe neve kemi korrupsion, por kemi ligje. Kemi një kontekst shoqëror që bën të jesh i turpëruar, nëse jeni të korruptuar. Kemi prokurorë dhe gjyqtarë që zbatojnë ligjet. Nëse dikush thyen ligjin, do të paguajë çmimin”.
THIRRJA
Ambasadorja e SHBA-VE në vendin tonë, Yuri Kim, apeloi duke thënë se duhet të jenë shqiptarët ata që të vendosin nëse vendi do të zotërohet nga krimi e korrupsioni apo nga njerëzit normalë. “Jeni në një moment kritik të historisë suaj, duhet të vendosni në çfarë rruge do të shkoni, përpara apo do të ecni pas. Kush do ta zotërojë vendin tuaj, do të jetë krimi i organizuar dhe oligarkët apo do të jenë njerëzit normalë, që edhe kanë mundësinë për të zotëruar prona dhe për të zhvilluar prona, dhe për t’u bërë të pasur. Ju duhet ta vendosni. A do të jetë rasti që të gjithë do të luftojmë për të gjetur lidhjet e veçanta, në mënyrë që t’ia dilni apo do të krijoni një sistem ku të gjithë janë të barabartë para ligjit. Ky është një çast i madh dhe unë besoj se ju duhet të bëni zgjedhjen e duhur, ashtu siç e keni bërë në çdo çast kritik”, tha ambasadorja Yuri Kim. Ajo vuri në dukje se Shqipëria ka bërë një progres të madh që nga përmbysja e komunizmit, por nga ana tjetër ky popull ka aftësi për shumë më tepër. “Do doja t’ju thosha se të gjithë ne, ju si qytetarë të Shqipërisë dhe unë si përfaqësuese e SHBAVE, të themi mjaft me korrupsionin, të mbrojmë demokracinë, Shqipëria të jetë më e fortë. Tani ja ku jemi, 31 apo 32 vite nga fundi i komunizmit, 100 vite qëkur SHBA dhe Shqipëria vendosën lidhjet diplomatike, ju duhet të kishit thënë 30 vite më parë se Shqipëria do të lëvizte nga një vend më i varfër në botë në një vend që ka një ekonomi në lulëzim. Por, gjithashtu është edhe frustruese sepse ky vend dhe ky popull ka aftësi shumë më tepër, por e bllokon korrupsioni. Perceptimi që më duhet të kem lidhje të veçanta, të jap ryshfet për të përdorur talentet e mia, kësaj duhet t’i jepet fund”, theksoi Yuri Kim. Ajo vuri në dukje se ka ardhur koha që ligji të zbatohet njësoj për të gjithë. “E turpshme që dikush të shmangë ligjin. Kemi qytetarë të arsimuar që e kuptojnë dhe kërkojnë të drejtën e tyre si baza për demokracinë. Ka ardhur koha që të thoni se ligji është i zbatueshëm për të gjithë, jo se jemi hakmarrës, por çdo qytetar duhet të trajtohet njësoj”, theksoi zj.kim. Ajo apeloi se Shqipëria duhet të jetë një partner i Amerikës e jo një problem, sa i përket luftës antikorrupsion. “Ne duam që Shqipëria të jetë përherë e më tepër një partner dhe jo një problem, ju duhet ta udhëhiqni luftën. Shpesh flasim për rolin e SHBA-VE dhe dëgjoj, ‘vetëm ju mund ta bëni’, por unë them që ‘ju duhet ta bëni’, SHBA-TË si miq tuaj do të jenë me ju, në çdo hap të udhës dhe në çdo hap të rrugës. Do të jetë e vështirë, ndonjëherë do ju shtyjmë, ndonjëherë nuk do të doni të vazhdoni më ose ne nuk duam që të vazhdojmë më”, deklaroi ajo. Sipas Kim, Shqipëria do të futet në BE, pasi sipas saj, çdo shtet anëtar mendon se vendi ynë i ka përmbushur kushtet. “Ky është çasti ku ju mund të qëndroni apo ngriheni në një nivel, ju jeni anëtarë të NATO-S, jeni në prag të Besë, ju do jeni anëtarë, çdo shtet bie dakord që Shqipëria ka bërë punën të jetë anëtare e Be-së”, deklaroi ambasadorja Kim.