Reforma në Drejtësi, Manja: Lufta antikorrupsionit është në rrugën e duhur
Ministri i Drejtësisë, Ulsi Manja, në Konferencën e Parë Kombëtare Antikorrupsionit shprehu besimin se Reforma në Drejtësi po konsolidohet dhe se SPAK dhe BKH kanë dhënë rezultate të prekshme tashmë në goditjen e korrupsionit në nivele të larta. Arritjet në luftën kundër korrupsionit, shtoi ministri, nuk do të ishin bërë të mundura nëse qeveria nuk do t’i kushtonte një rëndësi të veçantë këtij sistemi me mbështetje financiare nga buxheti i shtetit. “Reforma në Drejtësi pas 6 vitesh, konstatoj se faza e parë ajo e ngritjes dhe funksionalitetit, është tashmë e përfunduar. Kemi hyrë në fazën e dytë të konsolidimit. A i kemi mekanizmat e duhur antikorrupsion? Rezultati i parë është vettingu. Sot që flasim, 60 për qind e magjistratëve kanë kaluar në sitën e vettingut. Shifrat janë kokëforta, lufta kundër korrupsionit brenda këtij sistemi ka qenë në rrugën e duhur”, deklaroi Manja. Ai njoftoi se nga viti 2016-2022 ka dhënë për sistemet e reja të drejtësisë 114 mld lekë. “Dua të vë në dukje funksionimin e SPAK dhe BKH, që kanë dhënë rezultate të prekshme në goditjen e korrupsionit në nivele të larta. Kjo ishte diçka e paimagjinueshme dikur. Kjo nuk do të ishte bërë e mundur pa mbështetjen e duhur buxhetore financiare nga Qeveria. 2016-2022, 104 milionë lekë pa përfshirë ato që ka dhuruar SHBA e BE. Jemi të gatshëm që të buxhetojmë shtimin e numrit të prokurorëve, drejt atij numri që do të çmohet i nevojshëm”, theksoi Manja.