Vjosa Park Kombëtar, Rama ironi me aktorin hollivudian “Di Caprio u bë i gjallë vetëm për të goditur qeverinë”
Mbyllet debati për lumin, nënshkruhet Memorandumi i Mirëkuptimit
Vjosa do të shpallet Park Kombëtar. Në një aktivitet të posaçëm u firmos dje në Tiranë marrëveshja mes Ministrisë së Turizmit dhe organizatës amerikane “Patagonia” për nisjen e punës së përbashkët për ta shpallur Vjosën Park Kombëtar. Ky konsiderohet një hap i madh i shumëdëshiruar nga aktivistët në të gjithë botën, për krijimin e Parkut të parë Kombëtar për një lumë të egër në Europë. Në ceremoninë dedikuar nisjes së këtij bashkëpunimi, ishte Kryeministri Edi Rama, ministrja e Turizmit Kumbaro, CEO i “Patagonia Ryan Gellert”, organizata që bëjnë pjesë në koalicionin europian “Save the Blue Heart of
Europe” si “Riverwatch”, “Euronatur”, “Ecoalbania”, të ftuar nga trupi diplomatik, donatorë dhe ekspertë mjedisorë. “Zona që do mbulojë Parku Kombëtar është një zonë shumë
e madhe, faktikisht është Parku Kombëtar më i madh i Shqipërisë dhe na vë përpara detyrimit për të ndërtuar një ngrehinë të tërë institucionale. Ne kemi marrë një ekspertizë ndërkombëtare, përveç ekspertizës së brendshme, që të gjitha procedurat e shpalljes së Vjosës Park Kombëtar të jenë me standardet më të larta ndërkombëtare. Aty menjëherë marrin përsipër ndalimin kategorik të çdo biznesi apo veprimtarie ekonomike që mund të cenojë trupin e lumit dhe gjithë krahët e tij, por nga ana tjetër ne besojmë që, duke shpallur Vjosën Park Kombëtar, do të kemi një impakt ekonomik shumë më të lartë sesa çdo të ishte impakti ekonomik i bazuar te zhvillimi në dëm të Vjosës. Mjaft të llogarisim numrin e turistëve, që do të rritet për të ardhur në këtë Park Kombëtar, ashtu sikundër aktivitetet e natyrës që të arrijmë në këtë konkluzion”, deklaroi Rama. Kryeministri i ktheu përgjigje aktorit hollivudian, Leonardo Di Caprio, lidhur me kritikat që ai ka bërë ndaj qeverisë për mbrojtjen e lumit Vjosa. “Më kanë shënuar diçka këtu për Leonardo Di Caprio, por nuk po e them sepse u bë i gjallë për ta goditur qeverinë, por s’u bë i gjallë për ta mbështetur qeverinë”, tha Rama.