Harta e re gjyqësore, Berisha: KLGJ mbylli 18 gjykata me urdhër të Edi Ramës
Ish-kryeministri: Qytetarët duhet të udhëtojnë qindra kilometra për drejtësi “Në fillim përgjysmoi gjyqtarët dhe prokurorët me vetingun dhe krijoi stokun me 110 mijë dosje pa gjykuar, tani mbyll gjykata”
Ish-kryeministri Sali Berisha ka dalë kundër vendimit për mbylljen e 18 gjykatave në kuadër të hartës së re gjyqësore.
Në një deklaratë për mediat nga selia e Partisë Demokratike, Berisha akuzoi Kryeministrin Rama se pasi krijoi 110 mijë dosje të pashqyrtuara për shkak të pakësimit të gjyqtarëve dhe prokurorëve, tani mbyll gjykatat. “Harta e re e gjyqësorit e Edi Ramës është një ndëshkim i ri për qytetarët, një rrënim i së drejtës së qytetarëve shqiptarë për një proces të rregullt gjyqësor. Pas përgjysmimit të gjykatësve dhe prokurorëve me pseudoreformën e sistemit të drejtësisë dhe vetingun ‘gjah shtrigash’, vendosjen e saj në kontroll të plotë të ekzekutivit, krijimit të një stoku prej 110 mijë dosjeve gjyqësore dhe mohimit de facto të së drejtës së shqiptarëve për një proces të drejtë gjyqësor, Edi Rama urdhëroi me një akt të papërgjegjshëm dhe të mirëfilltë politik, KLGJ-NË e partisë, të mbyllë 18 gjykata në shkallë vendi”, tha Berisha.
GJYKATAT QË MBYLLEN
Reforma Territoriale e gjykatave prek 9 qytete. Ndërkohë që mbetet vetëm Gjykata e Apelit të Tiranës dhe mbyllen të gjitha të tjerat. “9 gjykata të shkallës së parë dhe mohohet faktikisht aksesi i qytetarëve të 9 qyteteve në sistemin e drejtësisë. Mbyllet Gjykata e Tropojës, Pukës, Matit, Kurbinit, Kavajës, Krujës, Lushnjës, Pogradecit dhe Përmetit. Mbyllen 4 gjykata administrative dhe ngelet vetëm një gjykatë në Tiranë dhe një në Lushnje. Mbyllen 5 gjykata të apelit dhe ngelet vetëm Apeli i Tiranës. Praktikë kjo, 100% e dështuar, pasi u eksperimentua në vitin 1999 nga qeveria e Ps-së”, vijoi ishkryeministri. Mbyllja e gjykatave, sipas ish-kryeministrit, vështirëson aksesin e qytetarëve për të gjetur drejtësi.
Kjo sipas tij është shkelje e të drejtave të njeriut. “Me këtë vendim, gjobiten e ndëshkohen banorët e dhjetë qyteteve të vendit, të cilët duhet të udhëtojnë disa prej tyre edhe qindra kilometra rrugë për të shkuar në gjykatën e rrethit tjetër, gjobiten qytetarët e të gjitha qarqeve të vendit përveç Tiranës, të cilët për të apeluar vendimin e gjykatës së faktit, duhet të bëjnë në shumë raste edhe mbi 300 km rrugë për të ardhur në Tiranë, duke rritur kështu shumë shpenzimet
e udhëtimit, hoteleve për këta qytetarë, si dhe duke shpenzuar kohën e tyre. Miratimi i hartës së re gjyqësore është një shkelje e rëndë e të drejtave të njeriut dhe lirive themelore të tij, të cilat mbrohen me Kushtetutë. Mbyllja e shumë prej Gjykatave, cenon dhe kufizon rëndë aksesin në drejtësi të individit, si dhe procesin e realizimit të mbrojtjes në çështjet penale, civile dhe administrative”, tha lideri historik i Pd-së teksa i kërkoi KLGJ-SË që të marrë parasysh
rekomandimet e grupeve të interesit. “Harta e re e gjyqësorit vjen në kundërshtim flagrant me kërkesat e drejta të Rezolutës më të fundit të Parlamentit Europian, për Shqipërinë, e cila në nenin e saj 37 kërkon që: “Harta e gjyqësorit duhet të marrë në konsideratë mendimet e grupeve të interesit dhe kushtet socialekonomike të grupeve vulnerabile dhe të përmirësojë cilësinë në gjykata dhe procesin e duhur ligjor”, përfundoi Berisha.