KLGJ injoroi Komitetin Shqiptar të Helsinkit, ja rekomandimi
Drejtoresha Ekzekutive e Komitetit Shqiptar të Helsinkit në Tiranë, Erida Skëndaj, përmes një materiali të gjatë të argumentuar, ka kundërshtuar mbylljen e gjykatave. Ajo thekson sugjerimin e organizmave të ndryshëm dhe ekspertëve të Këshillit të Europës, se harta e re gjyqësore krijon vështirësi për kategoritë e shtresave në nevojë, të grave apo komuniteteve të margjinalizuara. “Distanca e largët nga gjykata vlerësohet nga organizma apo ekspertë të Këshillit të Europës si pengesë kryesore për aksesin në drejtësi, e cila ndikon në mënyrë joproporcionale te njerëzit e varfër dhe në nevojë, duke përfshirë gratë, si dhe banorët që jetojnë në zonat rurale dhe janë të varfër, duke mos pasur akses në mjetet e transportit. Për të arritur në një vlerësim sa më realist dhe të gjithanshëm, është e nevojshme të kryhen konsultime të drejtpërdrejta me përdorues të sistemit gjyqësor dhe njerëzit në nevojë (si minoriteti rom dhe egjiptian, gratë në nevojë, personat me aftësi të kufizuara, njerëzit në pamundësi ekonomike, shtetasit e privuar nga liria etj.). Me rëndësi të veçantë është vlerësimi i zhvillimit ekonomik, si dhe shpërndarjes apo përqendrimit të popullatës në njësitë administrative të secilës bashki (kriteri demografik). Përcaktimi i distancave dhe kohës së udhëtimit janë indikatorë të rëndësishëm për qytetarin për të aksesuar shërbimin gjyqësor. Ky tregues nuk është përcaktuar objektivisht sipas kushteve të vendit tonë, cilësisë së rrugëve dhe transportit rrugor”, thyhet në prapësimet që ka bërë Komiteti Shqiptar i Helsinkit përmes Erida Skëndajt.