Aviacioni Civil, Zv/ministri: Kemi disa llogari të bllokuara
Projektligji, emërimi i drejtorit të Autoritetit do bëhet nga Kryeministri Penalizime për shkak të vendimeve të arbitrazhit? Bonati: Ka disa problematika financiare dhe një proces gjyqësor që po vazhdon
Autoritetit të Aviacionit Civil shqiptar i janë bllokuar disa të ardhura, për shkak të vendimit të Gjykatës Ndërkombëtare të Arbitazhit për çështjen “Beccheti”.
Gjatë prezantimit të projektligjit “Për organizimin dhe funksionimin e Autoritetit të Aviacionit Civil”, në Komisionin e Ekonomisë zëvendësministri i Infrastrukturës, Hantin Bonati, pranoi faktin që disa llogari janë të bllokuara, por shtoi se ka një proces gjyqësor që vazhdon. I pyetur nga deputetja e Pd-së, Jorida Tabaku nëse ka asete të sekuestruara apo llogari të bllokuara për shkak të vendimeve të gjykatave ndërkombëtarë, Bonati u shpreh se në dijeni të tij nuk ekziston asnjë prej penalizimeve të mësipërme për Autoritetin e Aviacionit Civil. “Për sa i përket sekuestrimit të aseteve, kemi dëgjuar shpesh në media që çështja ‘Beccheti’ ka ndikuar në sekuestrimin e disa aseteve që lidhen me Aviacionin Civil, por asnjëherë nuk kemi pasur informacion për këtë çështje.
Si është e vërteta e të ardhurave të Aviacionit Civil që vijnë nga tarifat të sekuestruara në lidhje me detyrime arbitrazhi ndërkombëtare që mund të ketë qeveria shqiptare?”, pyeti Tabaku zëvendësministrin e Infrastrukturës. Bonati iu përgjigj se: “Në dijeninë time nuk ka asnjë aset apo llogari bankare të sekuestruar. Ka disa problematika financiare. Janë disa të ardhura të bllokuara dhe është një proces gjyqësor që po vazhdon”. I pyetur se sa është numri i të ardhurave apo shuma financiare e tyre, Bonati u përgjigj se: “Nuk e kam këtë informacion, pasi pjesa e të ardhurave kontrollohet nga ‘Albkontrolli’, që është shoqëri aksionere dhe jo Autoriteti I Aviacionit Civil”.
PROJEKTLIGJI
Projektligji ka për objekt organizimin dhe funksionimin e Autoritetit të Aviacionit Civil, procedurat dhe legjislacionin e aplikueshëm për refuzimin, pezullimin dhe revokimin e licencave, lejeve, autorizimeve dhe certifikatave, llojet e tarifave për shërbimet që ofron, mënyrën e llogaritjes së tyre, mënyrën e administrimit të të ardhurave të realizuara prej tyre, si dhe rastet e përjashtimeve nga zbatimi i rregullave. Drejtori ekzekutiv është titullari i autoritetit, i cili emërohet me urdhër të Kryeministrit, me propozimin e ministrit, ndërsa kryetari dhe anëtarët e këshillit drejtues emërohen me Vendim të Këshillit te Ministrave, me propozimin e ministrit. Neni 17, pika 1 e projektligjit parashikon që “Struktura dhe organika e Autoritetit miratohen me urdhër të Kryeministrit, me propozim të ministrit”. Pika 2 e po këtij neni përcakton se: “Marrëdhëniet e punës për punonjësit e Autoritetit rregullohen në bazë të dispozitave të Kodit të Punës”. Ai parashikon për herë të parë një fond rezervë
që do të jetë në dispozicion për t’u përdorur në kushte të vështira. Institucioni është jo buxhetor, Autoriteti i Aviacionit Civil është subjekt i auditimit edhe nga KLSH.
DISKUTIMET
Kreu i LZHK, Dashamir Shehi, ngriti shqetësimin se ky projektligj duhet të trajtohet me vëmendje dhe jo si do ndahen lekët. “Duket sikur ligji po bëhet se si të zgjedhim këto hallet e lekëve dhe si do t’i vëmë drejtorët e shefat, ndërsa unë po them që do zgjedhim një gjë pak më të madhe ne. Ju jeni aparat teknokratësh që duhet të jepni garanci të tjera. Kërkohen disa lloj kompetencash dhe kërkohen disa lloj pagesash të veçanta. Kush e mbulon të gjithë hapësirën e çështjeve të Aviacionit? A ka mbivendosje institucionesh?”, pyeti Shehi. Nga ana tjetër, kryetari i Komisionit të Ekonomisë, Eduard Shalsi, u shpreh se:
“I vendosëm në statusin e nëpunësit civil në 2014, sot po i heqim. Meraku ynë është të dominojë profesionalizmi dhe të mos përsëriten ato gjëra që të në të kaluarën dhe që ende vazhdojnë të jenë objekt barsoletash. Në sektorë të tillë, t’u vihet një barrierë e fortë atyre emërimeve. Duam të sigurohemi që do jenë profesionistët ata që do menaxhojnë dhe nuk do ketë vend për qoka politike, familjare apo nepotike”. Hantin Bonati u shpreh se ndryshimi i statusit për punonjësit nga nëpunës civil me Kod Pune është për shkak të specifikave të punës dhe pagave. “Nga 80 vende punë që ka institucioni, 17 prej tyre janë vakante, sepse është e vështirë për t’i mbledhur dhe kjo detyron që ekspertizën institucioni ta marrë nga të tretë nga jashtë jo brenda institucionit me një kosto shumë më të lartë”, sqaroi zëvendësministri Bonati.