Deputetët e PD ridepozitojnë kërkesën për komisionin hetimor
Opozita kërkon hetimin e kontratave të investimeve strategjike
Deputetët e Partisë Demokratike nuk tërhiqen nga nisma e tyre për të ngritur një komision hetimor parlamentar për të kaluar në sitë të gjithë kontratat e dhëna me ligjin e veçantë të investimeve strategjike. 35 deputetë të opozitës ridepozituan të hënën kërkesën për ngritjen e Komisionit Hetimor për të verifikuar zbatimin e ligjit për investimet strategjike. Deputetët e opozitës janë të bindur se kontratat e dhëna deri më tani për investimet strategjike, kanë qenë me shkelje, ndaj insistojnë që të realizohet. Kujtojmë që maxhoranca socialiste rrëzoi të enjten kërkesën e deputetëve të opozitës për ngritjen e këtij komisioni. Fillimisht kërkesa ra pasi gjatë mbledhjes së Konferencës së Kryetarëve, kryetari i PAA-SË, Agron Duka, telefonoi
administratën e Kuvendit për të tërhequr firmën e tij nga nisma. Më pas Gazment Bardhi mori firmën e Lulzim Bashës dhe të Enkelejd Alibeajt, por PS e rrëzoi sërish në Konferencën e Kryetarëve me argumentin se firma e deputetit lejohet të përdoret vetëm një herë. Maxhoranca pretendoi se kërkesa duhet të ishte bërë
nga fillimi dhe firmat duhet të ishin mbledhur sërish pas tërheqjes së deputetit Duka. “Mblidhini të njëjtët firmëtarë dhe hajde të bëjmë debatin. Debati zhvillohet kur kërkesa përmbush kriteret formale. I përmbush kriteret formale me një deputet që thotë se është tërhequr. Kërkesën bëjeni nga fillimi për të plotësuar
kriterin formal”, u shpreh kreu i Grupit të Ps-së, Taulant Balla, rreth një javë më parë. Ndërkohë, nga ana tjetër, deputeti Gazment Bardhi tha se 36 deputetë kanë shprehur vullnetin e tyre për ngritjen e Komisionit Hetimor dhe se tërheqja e një deputeti nuk e zhbën vullnetin e nismëtarëve të tjerë. Bardhi akuzoi maxhorancën se po
nxjerr justifikime të kota, për të penguar hetimin dhe transparencën me abuzimet që qeveria po bën me pronat publike. “Ta harroni se mund të bllokoni një komision hetimor të kërkuar nga opozita konform ligjit dhe Kushtetutës. Dilni zbuluar se me atë ligj që është zbatuar, pasi miq dhe familjarë tuajt kanë
përfituar pasuri publike. Doni apo nuk doni ju, opozita do ta bëjë transparencën e plotë për sa u përket investimeve strategjike”, tha Bardhi. Ndërkohë, në kërkesën që u depozitua dje, Bardhi ka hequr emrat që janë shprehur në mbështetje të Berishës dhe ka kërkuar ndihmën e aleatëve si Fatmir Mediu dhe Dashamir Shehi.