Anija që transportonte misër ukrainas mbërrin në Spanjë
Një anije me 18,000 tonë misër ukrainas mbërriti të hënën herët në një port në Veriperëndim të Spanjës, duke përdorur atë që po fillon të cilësohet si një “rrugë e re detare” që synon të shmangë bllokadën e Rusisë ndaj porteve të Ukrainës në Detin e Zi. Anija e mallrave Alppila, e ngarkuar me misër, mbërriti në portin spanjoll të La Coruña para agimit të së hënës, tha zyra e shtypit e portit për CNN. Kjo është ngarkesa e parë e grurit ukrainas që arrin në Spanjën veriperëndimore përmes detit, duke përdorur “një rrugë të re detare të hapur në Detin Baltik për të shmangur bllokimin e marinës ruse të porteve të Ukrainës në Detin e Zi që nga fillimi i luftës”, thuhet në deklaratën e Grupit te Prodhuesve të Ushqimit “Agafac”. Lufta e Rusisë në Ukrainë mund të shtyjë deri në 49 milionë njerëz drejt urisë ose kushte të ngjashme me zinë e bukës, për shkak të ndikimit të saj shkatërrues në furnizimin dhe çmimet globale të ushqimit dhe vendet po përpiqen të gjejnë një mënyrë për të shmangur bllokadën. Të dielën, një zyrtar i qeverisë ukrainase i tha “Reuters” se Ukraina ka identifikuar rrugë alternative për të eksportuar grurin e depozituar në magazina. Zëvendësministri i Jashtëm dhe Shefi i Transformimit Dixhital, Dmytro Senik, tha se Ukraina po përpiqej të krijonte rrugë të reja me Ruman- inë, Poloninë dhe shtetet baltike, për të lejuar që 22 milionë tonë drithë i ngecur në portet detare të Ukrainës, “të arrijnë në destinacionin e tyre”. Sipas deklaratës së grupit “Agafac”, “sasi të vogla misri janë larguar nga Ukraina perëndimore me kamionë për në Poloni dhe Rumani” dhe se misri që mbërriti në Spanjë u ngarkua në një anije në portin Swinoujscie të Polonisë në Detin Baltik.