Territorialja, përplasja e parë pritet të jetë për procedurë
Sot mbledhja e parë për konstituimin dhe caktimin e sekretarit Alibeaj dhe Çupi informojnë deputetët dhe ndajnë punët: Në qershor, në terren për të marrë propozimet e ish-funksionarëve lokalë
Rreth 4 muaj pasi u miratua në Parlament, Komisioni i Posaçëm i Reformës territoriale do të nisë sot në orën 12:00 punën për hartën e re elektorale.
Komisioni i posaçëm do të ketë 18 anëtarë me dy bashkëkryetarë, Anila Denaj nga Partia Socialiste dhe Dhurata Çupi nga Partia Demokratike. Ndërkohë, sipas njoftimit që sekretaria e komisionit ka bërë për deputetët anëtarë të komisionit, sot do të konstituohet komisioni dhe do të caktohet sekretari i komisionit. Këtu pritet të jetë edhe përplasja e parë mes maxhorancës dhe opozitës, pasi komisioni ka përbërje të barabartë deputetësh dhe opozita nuk është dakord që sekretarin ta caktojë maxhoranca. Një nga zgjedhjet që do të propozohet sipas burimeve pranë opozitës do të jetë caktimi i dy sekretarëve. Mbledhja e Grupit të PD Nisja e Reformës Territoriale i gjeti demokratët të përçarë. Në komision nuk do të jetë asnjë nga deputetët që mbështet Sali Berishën. Megjithatë të hënën në mbrëmje, Enkelejd Alibeaj njoftoi të gjithë deputetët e Pdsë për mbledhje grupi për t’i informuar në lidhje me komisionin. Mesazhi u shkoi edhe deputetëve që nuk e njohin Alibeajn kryetar të Grupit Parlamentar. Ndërkohë, nga 52 deputetët që dolën nga lista e Pd-së më 25 prill, duke përjashtuar aleatët e vegjël, dje në mbledhje morën pjesë fizikisht vetëm 16 deputetë. Kastriot Piroli, Flamur Hoxha, Emilia Koliqi, Andia Ulliri, Dhurata Çupi, Gazment Bardhi, Sajmir Korreshi, Eralda Tase Bano, Zheni Gjergji, Ferdinand Xhaferraj, Enkelejd Alibeaj, Arbi Agalliu, Bledion Nallbati, Lefter Geshtenja, Orjola Pampuri, Xhelal Mziu iu përgjigjën pozitivisht thirrjes së Alibeajt. Megjithatë, mbledhja ishte informuese dhe jovendimmarrëse, ndaj Alibeaj vazhdoi sipas planit. Bashkëkryetarja e Komisionit të Reformës Territoriale, Dhurata Çupi, në fjalën e saj brenda mbledhjes, mësohet se kërkoi që në fazën e parë të punës të përfshihet një
fushatë komunikimi dhe informimi me qytetarët, mbi realitetin e reformës aktuale. Gjithashtu, ajo ka bërë të ditur se anëtarët e komisionit që përfaqësojnë Pd-në, kanë miratuar dy ekspertë që do t’i bashkëngjiten punës për Reformën Territoriale. “Ne dje (të hënën) jemi mbledhur anëtaret e komisionit që përfaqësojmë PD. Miratuam dy ekspertë që do na bashkëngjiten. Faza e parë duhet të jetë komunikimi me opinionin publik. Sot ka një reformë të dështuar sa u takon atyre çfarë u premtua në 2014ën. Një reformë që premtoi shumë, por sot jemi para realitetit që reforma ka dështuar. Ne duhet të komunikojmë me qytetarët mbi atë çka ndodhur deri sot me reformën. Ekspertët janë: Agron Haxhimali dhe Roland Bejko. Unë ju premtoj që do të bëj maksimumin tim si bashkëkryetare që të prodhojmë një produkt që u shërben qytetarëve”, është shprehur Çupi. Ndërkohë, deputeti i Pd-së Ferdinand Xhaferraj ka deklaruar gjatë mbledhjes se krahas interesit qytetar, opozita duhet të fokusohet edhe në interesin elektoral për sa i përket Reformës Territoriale. “Mendoj që komisioni ka një kompozim shumë të mirë, duke filluar nga Dhurata, që ka një artikulim të mirë. Ne duhet të kemi disa opsione. Dhe krahas interesit qytetar që është primar, sigurisht duhet të mbajmë në konsideratë edhe interesin elektoral. Nga të gjitha takimet që kemi pasur me qytetarë, ka një dakordësi për rritjen e
numrit të bashkive”, tha deputeti i Durrësit. Ndërsa deputeti i Devollit, Bledjon Nallbati, ka kërkuar që të gjithë deputetët demokratë, edhe ata të Rithemelimit, të jenë të informuar në kohë reale në lidhje me dokumentet që do
të prodhojë komisioni. Pas mbledhjes, në një prononcim për mediat, kreu i Grupit Parlamentar të Pd-së, Enkelejd Alibeaj, deklaroi se të gjithë deputetët u shprehën gjatë mbledhjes se reforma e vitit 2014 ishte e dështuar. “Si
synim final për Reformën Territoriale është përcjellja e të gjithë sensibiliteteve që publiku ka sot për reformën e 2014-ës. Në çfarëdolloj forumi që kemi pasur, ka qenë dështimi spektakolar i Reformës Territoriale. Ne kemi
synim që me një Reformë Territoriale, në qendër të jetë njeriu. Ky do të jetë kriteri i parë, të gjithë ramë dakord që kjo reformë është një dështim. Ekspertiza duhet të jetë pjesë e Reformës Territoriale”, tha Alibeaj.