Porosia e Moisiut për Begajn: Kur vidhet vota, dobësohet qytetari
Alfred Moisiu ishte ish-presidenti që u zgjodh nga Bajram Begaj për të zhvilluar takimin e parë pasi u zgjodh nga Parlamenti shqiptar në institucionin më të lartë shtetëror. Ishte Begaj i cili njoftoi takimin duke publikuar një foto me ish-kreun e shtetit. Ndërkohë, bëri edhe një reagim për media. “I përulur dhe i nderuar pranë këtij burri të urtë dhe patriot, i cili tanimë i përket historisë së vendit tonë si një president i të gjithë shqiptarëve. Me të gjithë shqiptarët dhe për të gjithë shqiptarët. Faleminderit me mirënjohje për bekimin tuaj, zoti President, Alfred Moisiu!”, tha Begaj. Ndërkohë Moisiu tregoi se kishte këshilluar Begajn që të mbronte votën e lirë. “Duhet njohur rëndësia e mekanizimit të votës së lirë. Nuk mund të tjetërsohet, të vidhet, të mashtrohet përmes kësaj vote. Sepse kur ndodh një gjë e tillë, pushtetarët bëhen edhe më të pushtetshëm, ndërsa dobësohet fuqia e qytetarëve, sepse i merret kjo fuqi që ua jep vota. Vota është fuqia e tyre dhe kur ajo vidhet, pushtetarët bëhen të paprekshëm. Ndaj kjo duhet të marrë fund, sepse po u jepet një mësim shumë i keq të rinjve të sotëm apo atyre që duan të bëhen pjesë e politikës së nesërme”, tregoi Moisiu.