“S’mban më ujë pilafi”, Qytetarët dalin në protestë kundër rritjes së çmimeve
Qytetarja: Do marr pjesë, gjithçka në stratosferë. Jetesa e papërballueshme Sot në orën 18:00 përballë Kryeministrisë, kundër çmimeve të naftës, produkteve të shportës dhe taksave të larta
Me sloganin “Nuk mban më ujë pilafi”, qytetarë të shumtë pritet të protestojnë sot përballë Kryeministrisë për të kundërshtuar rritjen e çmimeve në vend.
Qytetarët priten të mblidhen në sheshin “Skënderbej” në orën 18:00 dhe më pas do të drejtohen për te “Kryeministria”. Protesta është thirrur nga shoqëria civile, e cila kërkon reagim qytetar për sjellë e qeverisë, e cila sipas tyre jo vetëm që nuk ka marrë masat e nevojshme, por është shkaktare e rritjeve të çmimeve në treg. Në rrjetet sociale është shpërndarë në masë të madhe fotoja që fton qytetarët në protestë me sloganin: “S’mban më ujë pilafi”. Një nga organizatorët e kësaj proteste, aktivisti Arlind Qori, u shpreh për “News 24” se manifestimet do vijojnë deri në zgjidhjen e problematikave. Sipas tij, bordet e ngritura nuk kanë sjellë përmirësim të situatës, por vetëm sa kanë rënduar xhepat e qytetarëve. “Unë besoj se po, sepse asnjë nga ne nuk pret që qeveria të shohë protestën e parë dhe të pranojë kërkesat tona. Ne do të ngulim këmbë deri në përmirësimin e gjendjes ekonomike dhe shoqërore të vendit. Nuk është e rëndësishme nëse ngrihet një bord apo jo, se sa çfarë bën ai bord. Një bord i duhur, një bord që do kishte përfaqësues të shoqërisë, punëtorëve apo konsumatorëve, do ishte i arsyeshëm sepse do mbikëqyrte abuzimin dhe spekulimin”, u shpreh Arlind Qorri, ndërsa organizata rinore që ai drejton ka disa ditë që shpërndan në kryeqytet fletëpalosje për të informuar qytetarët për protestën dhe rëndësinë e pjesëmarrjes së gjithsecilit prej tyre. Përmes një statusi në “Facebook”, Qori thekson se: “Shqipëria është një nga vendet më të varfra dhe të keqqeverisura të Evropës, me pushtetarë që ndajnë me oligarkët pasurinë tonë të përbashkët dhe na kanë zhveshur nga çdo e drejtë ekonomiko-shoqërore”.
QYTETARËT
Të pyetur nga “News 24”, qytetarët shprehen se do të
marrin pjesë në protestë pasi çmimet e larta e kanë bërë të përballueshme jetesën e tyre. Për këtë ata bëjnë fajtore qeverinë që nuk u ka dalë në mbrojtje, ndërsa thonë se nafta, produktet e shportës dhe shumë mallra të tjerë kanë pësuar rritje të frikshme të çmimeve. “Patjetër që do të marr pjesë sepse gjithçka ka shkuar në stratosferë. Jetesa është e papërballueshme”, thotë një e re ndërsa një i ri tjetër shton se: “Patjetër që po! As diskutohet që do të marr dhe duhet të marrin pjesë. Arsyet janë duke filluar nga çmimi i naftës, çmimet e produkteve të shportës, ekonomia në treg është zero”. Një kryefamiljar thotë se njerëzit janë më të varfër se dje. “Do marrim pjesë se janë rritur çmimet. Sot njerëzit janë më të varfër dhe nuk kanë mundësi t’i përballojnë. Pse të mos marr pjesë?”, thotë ai. Një i moshuar kërkoi që protestës t’i bashkohen edhe pensionistët. “Patjetër që do marr pjesë. Çmimet sot në vend janë fatkeqësi kombëtare. Vetëm të japë dorëheqjen qeveria”, tha ai ndërsa një tjetër shtoi se: “Pensionistët i kanë dhënë votat të majtës dhe qeveria këta duhet ti shikojë. Me 700 mijë vota këta rrëzojnë qeverinë”. Teksa bëri një apel për mbështetjen e protestës edhe nga studentët, si një prej tyre tha një student që do të jetë nesër përballë Kryeministrisë në orën 18:00. “Për të gjithë duhet të protestojmë, edhe për
studentët të cilët duhet të jenë nesër në shesh”, tha studenti. Një e re, duke kujtuar shprehjen e Nënë Terezës, thotë se: “Pse duhet të ikim jashtë, ndërkohë që ne kemi mundësi ta jetojmë jetën tonë këtu. Zoti e ka krijuar një vend me shumë
mrekulli. Thjesht ajo pasuri që Zoti na e ka dhënë, duhet të ndahet në mënyrë të barabartë. “S’ka varfëri, atë e kemi krijuar ne”, thotë Nënë Tereza. Çfarë ka Gjermania për të shkuar atje, ndërkohë që i kemi të gjitha kushtet për të krijuar një jetë
shumë më të mirë se në gjermani. Më rrëqethet mishi kur shoh rininë që po e braktis vendin”, thotë e reja e indinjuar me politikën 30vjeçare në vend. Gjatë muajit qershor, çmimi i naftës ka arritur deri në 258 lekë për litër, ndërsa benzina rreth
10 lekë më pak. Qeveria ka përcaktuar përmes bordit edhe çmimet e produkteve kryesore të ushqimeve duke rritur pakënaqësitë e qytetarëve. Vaji i lulediellit është rritur si asnjëherë më parë me çmime deri në 430 lekë për kilogram.