Protesta e avokatëve çon në kolaps sistemin gjyqësor
Çfarë parashikon harta e re gjyqësore që kundërshtohet nga avokatët Nga Shkodra në Sarandë, avokatët njëzëri në grevë kundër hartës së re gjyqësore. Mbi 1 mijë seanca u anuluan gjatë së martës
Nga Tirana në të gjithë Shqipërinë, qindra avokatë bojkotuan gjatë ditës së djeshme seancat gjyqësore, në ditën e parë të grevës, e cila do të vazhdojë edhe në ditët në vijim.
Për pasojë, proceset gjyqësore janë paralizuar, përjashtuar ato të masave të sigurisë. Shkak për bojkotin e seancave u bë miratimi i hartës së re gjyqësore nga ana e Këshillit të Lartë Gjyqësor. Me hartën e re, 18 gjykata në të gjithë vendin mbyllen, duke “hedhur në rrugë” dhjetëra avokatë, ndërkohë që qytetarët duhet të udhëtojnë nga një qytet në tjetrin për të ngritur një padi ose për të ndjekur proceset gjyqësore, çka do të thotë më shumë shpenzime për ta dhe, sigurisht, kohë e humbur. Nga vendimi i KLGJ-SË, pesë gjykata apeli mbyllen në të gjithë vendin, katër gjykata administrative dhe nëntë gjykata të shkallës së parë.
GREVA
Rreth 2 mijë avokatë në të gjithë vendin nisën grevën gjatë ditës së djeshme, për të vijuar deri të premten e kësaj jave. Ata kërkojnë që KLGJ-JA të tërhiqet nga vendimi që redukton ndjeshëm numrin e gjykatave. Nëse nuk merren masa, avokatët paralajmërojnë se do të përshkallëzojnë protestën e tyre, duke braktisur edhe seancat për masa sigurie. Kjo do të thotë se shumë të arrestuar cenohen nga një proces i rregullt gjyqësor i ndjekur nga avokatë dhe, për pasojë, shkelje e së drejtës së tyre nga organet e drejtësisë. Nëse protesta përshkallëzohet, të arrestuarit rrezikojnë të lirohen për shkak të shkeljes së afateve të paraburgimit. Nga Shkodra deri në Sarandë, qindra seanca gjyqësore janë anuluar gjatë ditës së djeshme si pasojë e grevës së avokatëve, duke futur në paralizë sistemin. Edhe avokatët në Shkodër protestuan, duke anuluar të gjitha proceset gjyqësore. Të martën, në Gjykatat e Lezhës u anuluan 47 seanca gjyqësore në kuadër të grevës. Në Kukës, 20 seanca gjyqësore u anuluan gjatë ditës së djeshme, ndërsa tetë avokatët që ka rrethi morën pjesë vetëm në seanca për masë sigurie. Të njëjtin fat kanë pasur edhe seancat në Gjykatën e Tropojës, e cila, me hartën e re gjyqësore, pritet të shkrihet. Nëse vendimi do të miratohet përfundimisht, banorët e Tropojës do të duhet të udhëtojnë nga Kosova në drejtim të Kukësit për
seancat gjyqësore, ndërsa qyteti mbetet pa asnjë institucion qendror përveç Bashkisë. Në Gjykatën e Shkallës së Parë në Dibër, 5 seanca gjyqësore dështuan gjatë së martës e po kaq edhe në Gjykatën e Shkallës së Parë të Matit. Protestës së thirrur nga Dhoma Kombëtare e Avokatisë iu bashkuan edhe avokatët e Elbasanit. Në Gjykatën e këtij qyteti ishin parashikuar të trajtoheshin 120 çështje gjyqësore, por ato u anuluan për shkak të grevës. “Qytetarët dëmtohen shumë, sepse Rrethi Gjyqësor Elbasan është shumë i shtrirë. Thirrja jonë është që qeveria të mos miratojë
vendimin e KLGJ për hartën e re”, tha Demir Çiftja, kryetar i Dhomës së Avokatisë në Elbasan. Në Tiranë, plot 215 seanca gjyqësore u anuluan përfshirë Gjykatën Administrative, Apelin, Dhomën Penale, GJKKO dhe Gjykatën e Shkallës së Parë. Ndërkohë, në Durrës, 220 seanca u pezulluan në të tri gjykata që ka qyteti. Edhe avokatët e Vlorës mbështetën grevën e thirrur nga ana e Dhomës Kombëtare të Avokatisë, duke pezulluar 124 seanca. Avokatët e Beratit u bashkuan në grevën e kolegëve të tyre, edhe pse gjykata atje nuk do të mbyllet. Plot 134 seanca
gjyqësore u anuluan në të gjitha gjykatat e Qarkut të Gjirokastrës. Edhe avokatët e Sarandës protestuan njësoj si kolegët e tyre, pavarësisht se gjykata atje nuk mbyllet, ndërsa Apelit dhe proceset administrative i kryejnë në Gjirokastër. Rreth 100 seanca janë shtyrë në Korçë dhe Po- gradec, pasi në rang qarku do të mbetet vetëm një Gjykatë e Shkallës së Parë. Bojkotit të seancave gjyqësore i është bashkuar edhe Dhoma Ven- dore e Avokatisë ne Vlorë, ku janë anuluar 60 seanca në Gjykatën e Faktit, 40 në Apel dhe 24 seanca në Gjykatën Administrative.