Peruja kap dy shqiptarët, krerë të “Kartelit të Ballkanit”
Kush janë kapot që u prangosën në një hotel luksoz në Peru
Prej ditësh, Policia peruane është vënë në ndjekje të dy personave që pretendohej se ishin zotëruesit e 2.2 tonëve kokainë që kishin siguruar mundësinë e nisjes për në Holandë. Ata i kanë identifikuar, gjurmuar dhe më pas arrestuar në një hotel dhe dje kanë nxjerrë edhe emrat e tyre. Bëhet fjalë për emra mjaft të njohur në fushën e narkotikëve në vendin tonë, ndërkohë që sipas autoriteteve peruane, ata jo vetëm që janë kapo të grupit të trafikut të kokainës nga vendet e origjinës në drejtim të Europës, por madje janë edhe pjesë e klanit të frikshëm të Ballkanit. Sipas të dhënave, mësohet se ata janë të skeduar që në operacionin e shkurtit të këtij viti, ku në Ekuador u kapën jo pak, por 1.4 tonë kokainë që ishte nisur në drejtim të vendeve të Be-së.
MEDIAT PERUANE PËR SHQIPTARËT
Janë identifikuar dy shqiptarët e kërkuar nga Policia peruane për 2.2 tonë kokainë të kapur në këtë shtet disa ditë më parë, me destinacion Holandën. Sipas mediave peruane, eksportuesi paguante për trafikantët e drogës qëndrimin në hotelin “QP Hotels Trujillo” në El Golf, ku edhe janë fotografuar. Ata janë Franc Malo nga Elbasani dhe Gentjan Meta nga Durrësi, të njohur me pseudonimet “Barbas” dhe “Pelado”. Sipas Policisë kundër narkotikëve, trafikantët e drogës frekuentonin ambientet e një kompanie agroindustriale me vendndodhje në Moche. “Dy përfaqësues të mafies shqiptare, të cilët janë pjesë e kartelit ‘Los Balcanes’, kanë qëndruar në një hotel luksoz, që ndodhet në urbanizimin ekskluziv të ‘El Golf’, të cilët kanë ardhur në Peru me qëllim financimin, si dhe për t’u kujdesur për logjistikën e koordinim për dërgimin e më shumë se dy tonëve kokainë, e kamufluar në formë të lëngshme në kanoçe asparagusi, me vlerë 160 milionë dollarë, që do të kishte si destinacion Holandën. Ata janë shtetasit shqiptarë Franc Malo dhe Gentjan Meta. Të dy, të njohur si ‘Barbas’ dhe ‘Pelado’, kanë hyrë legalisht në Peru, duke u paraqitur si turistë, përmes Ekuadorit, për të nisur negociatat për dërgesën e drogës që do të merrej me rrugë detare përmes portit të Callaos”, shkruan media peruane.
Sipas hetimeve të kryera nga autoritetet, ngarkesa e kokainës ishte në pronësi të bandës “Los Pachenca”, e cila do të lidhej me organizatën europiane të trafikut transnacional, e njohur si karteli “Los Balcanes” (Ballkani)
OPERACIONI I SHKURTIT
Ishte mesi i shkurtit të këtij viti kur 1.4 tonë kokainë u gjendën brenda kontejnerëve me banane që kishin si destinacion portin e Anterpen, Belgjikë. Droga u sekuestrua gjatë dy operacioneve pasi Policia mori sinjalizimin se një ngarkesë e madhe po vinte drejt Belgjikës, duke finalizuar kështu operacionin e koduar “Shqiponja e zezë”, që çoi në pranga 45 shqiptarë, ende të paidentifikuar nga autoritetet vendase. Sipas hetimeve të kryera nga autoritetet, ngarkesa e kokainës ishte në pronësi të bandës “Los Pachenca”, e cila do të lidhej me organizatën europiane të trafikut
transnacional, e njohur si karteli “Los Balcanes” (Ballkani). Kjo ngarkesë do të kishte si destinacion përfundimtar tregun e Mbretërisë së Bashkuar, Spanjës dhe Italisë, por u sekuestrua falë zbatimit të strategjisë “Emerald”. Por kapja e kokainës ka shkaktuar përplasje mes “Los Pachenca” dhe “Clan del Golfo”. Në orët e fundit, banorët e qytezës Palmor kanë raportuar përleshje midis grupeve të armatosura. Përplasja mes grupeve të armatosura ndodh në sektorin La Bodega, ndërsa banorët e tjerë janë detyruar që të largohen nga zona. Mesa duket, humbja e 50 milionë dollarëve nuk është përjetuar mirë nga grupet që nisin “pakot” për në Europë.