Ukraina thotë se forcat e saj vazhdojnë qëndresën në Severodonetsk
Rusia: Do t’u japim luftëtarëve ukrainas të rrethuar një shans për t’u dorëzuar SHBA pret më shumë angazhime për dërgesa armësh në Ukrainë gjatë takimit kyç me pjesëmarrjen e zyrtarëve të 50 vendeve
Luftimet intensive vazhdojnë brenda Severodonetsk, një nga qendrat e fundit të Ukrainës në rajonin e Luhanskut, dhe më gjerësisht, në të gjithë Donbasin lindor të vendit, tha në konferencën për shtyp të hënën zëdhënësi i Ministrisë së Mbrojtjes të Ukrainës, Oleksandr Motuzianyk.
Ukraina tha të martën se forcat e saj po vazhdonin të bënin qëndresë në Severodonetsk dhe po përpiqeshin të evakuonin civilët, pasi Rusia shkatërroi urën e fundit në qytetin lindor ku prej disa javësh po zhvillohen disa nga betejat më të përgjakshme të luftës. Rusia tha se do t’u japë një shans për t’u dorëzuar deri të mërkurën në mëngjes luftëtarëve ukrainas të strehuar në një fabrikë kimike brenda qytetit. Ukraina thotë se rreth 500 civilë mbeten në fabrikën Azot dhe se ushtria e saj po përpiqet t’i largojë ata në një vend të sigurt. Luftëtarët duhet të “ndalin rezistencën e tyre të kotë dhe të dorëzojnë armët deri në orën 8 të mëngjesit”, është shprehur zyrtari i lartë rus Mikhail Mizintsev, sipas agjencisë së lajmeve “Interfax”. Civilët do të lejohen të largohen përmes një “korridori humanitar”, tha ai. Zyrtarët ukrainas thanë të martën se shkatërrimi i urës bllokonte rrugën e evakuimit për civilët që janë ende në qytetin lindor. Guvernatori rajonal, Serhiy Haidai, tha të hënën në rrjetin “Telegram” se trupat ruse kontrollojnë rreth 70 për qind të qytetit dhe i kanë larguar forcat ukrainase nga qendra. Presidenti ukrainas, Volodymyr Zelenskyy,
tha se beteja për rajonin e Donbasit “me siguri do të hyjë në historinë ushtarake si një nga betejat më të dhunshme në Europë”. “Për ne, çmimi i kësaj beteje është shumë i lartë. Është shumë e frikshme”, tha Presidenti Zelenskyy. Ai përsëriti thirrjet ndaj vendet partnere që t’i dërgojnë Ukrainës artileri moderne për ta përdorur ndaj forcave ruse. Këshilltari i presidentit Zelenskyy, Mykhailo Podolyak, shkroi në “Twitter” të hënën se për t’i dhënë fund luftës, Ukraina ka nevojë për armë të rënda”. “Takimi i Grupit të Kontaktit të Ministrave të Mbrojtjes mbahet në Bruksel më 15 qershor”, tha këshilltari Podolyak. “Ne presim një vendim”. Sekretari amerikan i Mbrojtjes, Lloyd Austin, do të drejtojë takimin në selinë e NATO-S, me pjesëmarrjen e përfaqësuesve nga 50
vende. Ku SHBA pret të ketë më shumë njoftime për dërgesa të armëve dhe pajisjeve në Ukrainë gjatë këtij takimi të rëndësishëm të mërkurën, sipas një zyrtari të lartë të mbrojtjes amerikane. Zyrtarët ukrainas kanë paralajmëruar se Rusia po fiton terren në rajonin Donbas të Ukrainës lindore, veçanërisht në qytetin Severodonestk, i cili ka parë disa nga luftimet më të ashpra kohët e fundit. Pa një ndihmë më të madhe në armatim, disa zyrtarë ukrainas kanë thënë se do të jetë gjithnjë e më e vështirë për të ndalur përparimin në rritje të Rusisë ose për të rimarrë tokën e pushtuar në rajon. Ministria e Mbrojtjes e Britanisë tha të hënën se ditët e fundit beteja rreth Severodonetsk “ka vazhduar të bëhet e furishme”. Rusia pretendon se tashmë kontrollon 97 për qind të provincës Luhansk, ku ndodhet Sievierodonetsku. Por pushtimi i qytetit industrial të Sievierodonetskut, me një popullsi prej 100,000 banorësh (shifra para luftës), mbetet vendimtar për qëllimin më të gjerë të Moskës për të kontrolluar rajonin lindor të Donbasit, i cili përfshin provincat Luhansk dhe Donetsk. Rusia aneksoi Gadishullin e Krimesë në vitin 2014 dhe forcat e Kievit që atëherë kanë luftuar me separatistët pro-rusë në rajonin e Donbasit.