Abazoviç: Ju ndihmojmë për rindërtimin e Ukrainës
Kryeministri i Malit të Zi, Dritan Abazoviç, gjatë një konference të përbashkët me Kryeministrin Edi Rama dhe Presidentin Zelenskyy në Ukrainë, shprehu mbështetjen e Malit të Zi për rindërtimin e Ukrainës pas përfundimit të agresionit rus. Sipas Abazoviçit, vizita e tij dhe e Ramës në Ukrainë, ishte një mesazh i fortë për vendet e Be-së. “Lufta të ndalet. Duhet të gjejmë një rrugë për të ndaluar shkatërrimet masive, vrasjet e njerëzve. Do të keni mbështetje të plotë për rindërtimin. Ne jemi vende të vogla, por keni mbështetjen tonë, do të japim kontributin tonë. Ne shpresojmë që kjo vizitë, ky samit i 3 kryeministrave nga BP, është një mesazh i fortë për vendet e Be-së, për partnerët e Be-së që kanë mundësi reale për të bërë më shumë se ne. Ajo çfarë keni bërë deri më tani, është e pabesueshme. Keni mbështetjen tonë. Duam që të vijmë në atë kohë kur të flasim për marrëdhënie ekonomike mes vendeve tona. Të jeni të sigurt që ne ndajmë këtë përvojë prej rreth 3 dekadave më parë, e dimë saktësisht çfarë është agresioni”, tha Abazoviç.