Objektet që nuk legalizohen, 50 mijë vetëm në kryeqytetet
Gati gjysma e objekteve që nuk legalizohen, sipas të dhënave të Agjencisë së Kadastrës janë në kryeqytet. Me ndryshimet që i janë bërë ligjit, shtëpitë nuk kualifikohen nëse janë afër akseve rrugore ose të ndërtuara përgjatë vijës ku është planifikuar të kalojë një rrugë. Te penalizuar janë edhe ata që kanë ndërtuar në afërsi të shkollave apo objekteve të tjera publike, në zona të mbrojtura si edhe në territore të projektuara për investime strategjike. Në ligjin “Për përfundimin e proceseve kalimtare të pronësisë” janë përcaktuar edhe afate konkrete për përmbylljen e procedurave të legalizimit për ato që janë në proces. Kështu, do të duhen vetëm dy muaj për t’u pajisur me certifikatë pronësie, dhe nëse do të ketë nga ata që duan ta mbyllin këtë praktikë më shpejt, mund ta bëjnë këtë përkundrejt një tarife shtesë. “ASHK-JA, brenda 60 ditëve nga përfundimi i procedurave të kualifikimit, ligjëson ndërtimin, duke respektuar dispozitat e legjislacionit në fuqi për regjimet pasurore martesore, sipas gjendjes të momentit të aplikimit për ligjësim. Poseduesi i ndërtimit pa leje ka të drejtë të kërkojë përfundimin e procedurave administrative brenda 30 ditëve, nga paraqitja e kërkesës, kundrejt pagesës së një tarife shërbimi shtesë”, saktësohet në ligj.