Ngërçi me negociatat, pse Bullgaria ka bllokuar Shqipërinë dhe MV
Bullgaria po mban peng anëtarësimin e Shqipërisë dhe Maqedonisë së Veriut në Bashkimit Europian për shkak të mosmarrëveshjeve midis saj dhe Shkupit. Sipas autoriteteve të larta të Bullgarisë, Maqedonia e Veriut nuk po zbaton marrëveshjen e miqësisë midis dy fqinjëve ballkanikë të nënshkruar në 2017 dhe ka politika të bazuara në urrejtje ndaj Bullgarisë. Sofja dëshiron që fqinji i saj të pranojë që kombi dhe gjuha e saj kanë rrënjë bullgare dhe dëshiron që ajo t’i japë fund retorikës anti-bullgare. Shkupi argumenton se identiteti dhe gjuha e tij nuk janë të hapura për diskutim. Një komitet historik dypalësh u krijua nën kushtet e traktatit të miqësisë për të zgjidhur problemet e interpretimit të historisë së përbashkët. Sidoqoftë, Shkupi nuk ka rënë dakord për asnjë marrëveshje. Presidenti maqedonas, Stevo Pendarovski, gjatë konferencës së djeshme me Presidentin e Ke-së, i pyetur për raportin e publikuar nga mediat bullgare, ku thuhet që Sofja do të zhbllokojë procesin pas një marrëveshje me Francën u përgjigj: “Ne në Shkup, këtu, nuk kemi parë një propozim francez. Ne jemi duke biseduar me kolegët tanë bullgarë dhe për ato bisedime jeni njoftuar nga Ministria e Punëve të Jashtme. Nuk kam ndërmend të komentoj se çfarë po ndodh në Sofje, është dinamika e tyre e brendshme politike”.