Zhbllokimi i negociatave në Samitin e Be-së? Presidenti i KE: Koha për të vepruar
Franca i dërgon Bullgarisë propozimin për heqjen e vetos Çështja e vetos bullgare për integrimin e MV në BE, drejt zgjidhjes. Michel: Shumë shpejt do kemi zhvillime pozitive
Më 23 qershor, liderët e Be-së do të mblidhen për të diskutuar për hapjen e konferencës së parë ndërqeveritare për Shqipërinë dhe MV.
Nuk ka ende një vendim, por çështja e vetos bullgare për integrimin e MV në BE mund të jetë drejt zgjidhjes, duke i hapur kështu rrugën integrimit të saj dhe Shqipërisë. Presidenti i Këshillit Europian, Chales Michel, në Forumin e Prespës në Ohër paralajmëroi dje se javën e ardhshme priten zhvillime pozitive sa i përket hapjes së negociatave të anëtarësimit të Be-së me Tiranën dhe Shkupin. Deklarata shpresëdhënëse vjen përpara samitit të 27 vendeve të Unionit me liderët e Ballkanit Perëndimor në Bruksel. Ndërkohë, në lidhje me këtë Franca do t’u dërgojë shteteve anëtare të Be-së propozimin për heqjen e vetos bullgare ndaj MV, gjë e cila do lejonte caktimin e datës për konferencën e parë ndërqeveritare edhe me Shqipërinë. Agjencia e lajmeve BGNES në Sofje shkruan se Kryeministri Kiril Petkov do ta dërgojë dokumentin e qeverisë së Parisit në Kuvend për shqyrtim. Madje, ai ka paralajmëruar të gjithë politikanët bullgarë të përgatiten për një “sulm brutal diplomatik” nga ana e diplomatëve të huaj në Sofje. Më aktivët, sipas tij, do të jenë ambasadorët e Francës, Gjermanisë dhe SHBA. Presidenti i Këshillit Europian, Chales Michel, në Forumin e Prespës në Ohër njoftoi dje në Ohër se zyrtarët e Unionit po punojnë intensivisht për të zgjidhur çështjet mes Sofjes dhe Shkupit. Ai u shpreh optimist pas takimit me Presidentin maqedonas, Stevo Pendarovski, me mundësinë e shpejtë të hapjes së negociatave të Shqipërisë dhe MV me Be-në. “Aktualisht nuk mund të them se cili do të jetë rezultati. Ne do të bëjmë
gjithçka për të ndërmarrë hapa vendimtarë në të ardhmen. MV dhe Shqipëria duhet të nisin sa më shpejt negociatat me Be-në, gjë që është e rëndësishme jo vetëm për të dyja vendet, por edhe për rajonin në tërësi, veçanërisht
në kontekstin e zhvillimeve të reja gjeopolitike. Ka zhgënjim dhe mosbesim nga të dyja palët. Është koha për të vepruar. Lufta në Ukrainë e përshpejtoi procesin. Ne duam të zhbllokojmë procesin për Shkupin dhe Tiranën.
Ne mbështesim të gjitha përpjekjet për të gjetur zgjidhje të pranueshme reciprokisht për çështjet e hapura dypalëshe me Bullgarinë. Kam besim se shumë shpejt do të kemi zhvillime pozitive”, u shpreh z.michel.