Abuzuan me tenderë, ndëshkohen 44 punonjës të Bashkisë së Vlorës
Tenderët “fundosin” dhjetëra punonjës të zyrës juridike dhe asaj urbanistike në Bashkinë e Vlorës, midis tyre dhe drejtorë. Më shumë se pesë 5 persona, shefa të sektorëve të ndryshëm, janë pezulluar nga shërbimi civil për 5 vjet. Ndëshkimet mësohet të kenë ardhur pas kontrolleve disamujore të ushtruara nga Kontrolli i Lartë i Shtetit. Burime konfidenciale bëjnë me dije se bëhet fjalë për 44 persona dhe se vendimi iu është komunikuar personave të përfshirë, por ende nuk ka një komunikim zyrtar në lidhje me shkaqet e pezullimit, si dhe emrat konkretë. Pritet që vetë KLSH të dalë me një informacion zyrtar mbi këtë kontroll dhe abuzimet e vërejtura. Masa e largimit është marrë për tetë punonjës, nga të cilët pesë drejtorë dhe tre specialistë; 28 të tjerë janë pezulluar nga e drejta e ngritjes në detyrë, ndërsa për pjesën tjetër, janë dhënë masa disiplinore. Në mesin e këtyre të fundit janë një seri profilesh, prej të cilëve dy drejtorë, përgjegjës sektori, specialistë dhe mbikëqyrës punimesh. KLSH ka kërkuar që zyrtarët, të cilët janë shefa në disa sektorë, të shkarkohen, dhe të pezullohen nga shërbimi civil për 5 vite. Auditi mësohet të ketë zgjatur disa muaj.