Terrorizoi fqinjët me automatik, arrestohet adoleshenti
Një adoleshent përfundoi në prangat e Policisë pasi terrorizoi fqinjët e tij me armë zjarri, duke qëlluar në ajër. Ngjarja ndodhi në fshatin Gjat në zonën e Lunxhërisë në Gjirokastër. Kanë qenë banorët e fshatit ata që kanë lajmëruar Policinë. “Si rezultat i veprimeve intensive dhe profesionale, bazuar edhe në informacionet e marra në rrugë policore, u bë i mundur identifikimi, kapja dhe arrestimi në flagrancë i shtetasit P. Dh., 17 vjeç, banues në fshatin Gjat, Gjirokastër. Ky shtetas dyshohet se në orët e mbrëmjes së djeshme ka qëlluar në ajër me armë zjarri automatike, në fshatin Gjat, Lunxhëri. Pasi ka qëlluar, 17-vjeçari ka fshehur armën e zjarrit dhe është larguar, por është kapur brenda pak orësh nga shërbimet e Policisë. Gjithashtu, nga Policia është gjetur dhe sekuestruar në cilësinë e provës materiale arma e zjarrit, me të cilën dyshohet se ky shtetas ka qëlluar në ajër, si dhe dy krehra. Nga kontrolli i ushtruar në banesën e shtetasit të arrestuar, u gjet edhe një armë sportive, të cilën ky shtetas e dispononte pa lejen përkatëse”, sqaroi Policia. Materialet i kaluan Prokurorisë së Rrethit Gjyqësor Gjirokastër, ndërsa adoleshenti akuzohet për dy vepra penale.