“Ekonomia, Moddy’s konfirmon vlerësimin në B1" Agjencia e parashikon në ulje rritjen ekonomike

Pavarësisht krizës së shkaktuar nga konflikti në Ukrainë, ekonomia shqiptare vijon të performojë pozitivisht. Në analizën vjetore “të thelluar”, publikuar një ditë më parë, agjencia ndërkombëtare e vlerësimit të kredibilitetit (credit rating agency), “Moddy’s”, rikonfirmon për Shqipërinë vlerësimin aktual në “B1 – me perspektivë të qëndrueshme”. Agjencia projekton rritje të vazhdueshme të PBB në 2022 dhe 2023, por ka rishikuar në ulje parashikimin e rritjes për shkak të ndikimit kryesisht indirekt të konfliktit Rusi-ukrainë dhe sanksioneve ndërkombëtare. Agjencia tashmë parashikon rritje të PBB prej 3.4% në vitin 2022 dhe 3.6% në 2023 krahasuar me respektivisht 4.5% dhe 4.0% që parashikonte në fillim të marsit. Kostot më të larta të energjisë dhe mallrave të tjerë krijojnë presione të qenësishme inflacioniste, që reflektohen në një kërkesë të brendshme më të dobët, si dhe reduktojnë rritjen ekonomike të vendeve të origjinës së turizmit në Shqipëri. Agjencia është e opinionit se perspektiva ekonomike e Shqipërisë shfaqet e rrethuar nga një shkallë e lartë pasigurie për shkak të konfliktit Rusi-ukrainë, por ekspozimi i drejtpërdrejtë i Shqipërisë ndaj të dyja vendeve është i ulët. Kjo vlen jo vetëm për sektorin energjetik, por edhe për turizmin. Në raportin vjetor, agjencia vëren se përhapja e koronavirusit ndikoi rëndë ecurinë ekonomike të Shqipërisë në vitin 2020. Megjithatë, tkurrja ishte më e butë dhe rimëkëmbja ishte më e fortë nga sa parashikohej fillimisht nga agjencia. Politikat fiskale dhe monetare të ndjekura pas tërmetit dhe gjatë pandemisë, ruajtën stabilitetin makroekonomik. Nga ana tjetër, theksohet në raport se efektiviteti i politikës fiskale është përmirësuar gradualisht dhe ka të ngjarë të forcohet me reforma të mëtejshme. Shqipëria ka përmirësuar planifikimin dhe ekzekutimin e saj fiskal në vitet e fundit. Në mesin e vitit 2016, Ligji Organik i Buxhetit u amendua dhe u vendosën mekanizma për të parandaluar rrëshqitjen fiskale në prag të zgjedhjeve, të cilat u dëshmuan efektive gjatë dy cikleve të fundit zgjedhore në 2017 dhe 2021. Agjencia parashikon se borxhi ndaj PBB-SË do të vazhdojë të ulet në 2022 dhe 2023 dhe treguesit e përballueshmërisë së borxhit do të mbeten në nivele relativisht të mira. Shqipëria ka tregues më të fortë të përballueshmërisë së borxhit krahasuar me medianën e vendeve që vlerëson me “B1”. Në vitin 2021, Shqipëria kishte një raport të interesave ndaj PBB prej 1.9% kundrejt medianës së vendeve “B1” prej 2.4%, dhe një raport pagesash interesi ndaj të ardhurave prej 7.0% kundrejt medianës së vendeve “B1” prej 12.6%. Sa i takon inflacionit, Agjencia vlerëson se çmimet e energjisë ishin nxitësi kryesor i rritjes së inflacionit total. Agjencia parashikon që inflacioni i çmimeve të konsumit të mbetet mbi 5% për pjesën e mbetur të 2022-shit, përpara se të zbutet në 3.5% deri në fund të 2023-shit. Për 2022-shin dhe 2023-shin, agjencia parashikon inflacionin mesatar të çmimeve të konsumit përkatësisht në 5.3% dhe 3.8%. Në plan afatgjatë, agjencia është e opinionit se aftësia e vendit për të vijuar në mënyrë të qëndrueshme procesin e konvergimit të nivelit të të ardhurave për banorë drejt niveleve që kanë vendet e Be-së, do të varet nga suksesi i qeverisë në vijueshmërinë e implementimit të reformave strukturore.