Spanja godet organizatën shqiptare të drogës Si funksiononte rrjeti që “habiti” hetuesit spanjollë
Plot 56 persona janë arrestuar në Spanjë, ndërsa autoritetet vendase goditën një rrjet të gjerë të prodhimit dhe trafikimit të marijuanës në Evropës. Të arrestuarit, shumica prej të cilëve shqiptarë, janë të moshave nga 19 deri në 58 vjeç, ndërsa akuzohen për pjesëmarrje në një organizatë kriminale përveç akuzave për prodhimin e drogës. Mediat spanjolle shkruajnë se për çmontimin e një prej rrjeteve më të mëdha kriminale me qendër në Katalonjë janë dashur një vit hetime. Vlerësohet se përfitimet e organizatës ishin 3 milionë euro në vit, shifër që do të shkonte në 12 milionë euro, ndërsa droga të eksportohej jashtë Spanjës. Organizata drejtuar nga shqiptarë, bashkëpunonte me prodhues vendas dhe me degë në katër provinca, por me fokus të veçantë në Girona dhe Tarragona. Grupi ishte i mirëstrukturuar, me pozicione të mirëpërcaktuara dhe me nivele “profesionalizmi” dhe “sofistikimi” të paprecedent deri më sot, ka deklaruar Josep Boixadé, kreu i Divizionit të Hetimit Kriminal.
SI NISËN HETIMET
Në fakt, ishte pikërisht kompleksiteti i instalimit elektrik dhe montimi i shkëlqyer i infrastrukturës që i shtyu hetuesit të dyshonin, pas zbulimit të një plantacioni në Sant Vicenç de Castellet (Bages, Barcelona), se kishin të bënin me një makro-organizatë me shumë burime. Ky konstatim, në maj 2021, çoi në këtë hetim dhe menjëherë më pas, hetimet e para treguan se ekzistonte një rrjet i tërë plantacionesh të ngjashme, me të njëjtën strukturë elektrike, në të gjithë territorin katalanas. U zbulua gjithashtu, se të gjitha plantacionet drejtoheshin nga njerëz me origjinë shqiptare dhe kishin të njëjtin elektricist profesionist, i cili ishte përgjegjës për hapjen e plantacionit. Ai gjithashtu, kujdesej edhe për instalimin e një sistemi të avancuar të ujitjes. Në këtë kuptim, ky hetim ka llogaritur
se kjo organizatë mund të ketë vjedhur 1.5 milionë euro nga rrjeti elektrik, duke konsumuar energjinë e rreth 1256 shtëpive. Plantacionet merreshin me qira. Pas operacionit të gjerë u zhvilluan kontrolle në 37 ndërtesa, u çmontuan 24 plantacione, duke sekuestruar 166 kg boçe kanabisi gati për shitje. Gjithashtu gjatë operacionit janë gjetur edhe 225.765 euro para të gatshme dhe armë të ndryshme. Sipas hetimeve, drejtuesit e kësaj organizate kriminale punësuan bashkatdhetarë shqiptarë pa precedentë penalë për të punuar në plantacionet e tyre. Nëse arrestoheshin, ktheheshin në Shqipëri dhe punësoheshin të tjerë. Përveç kësaj, ata iu nënshtruan një kontrolli të rreptë për të siguruar që biznesi i tyre të mbahej larg Policisë dhe grupeve rivale. Ata kultivuan dy lloje marijuane, çmimi i së cilës në tregun e zi varion nga 2300 deri në 2500 euro për kilogram. Një pjesë e parave dërgoheshin në Shqipëri.