Kremlini: Rusia do të përfundojë misionin e saj në Donbas
Rusia planifikon t’u rezistojë sanksioneve perëndimore dhe të përfundojë qëllimin e saj në rajonin e Donbasit në Ukrainën lindore, tha të enjten për CNN zëdhënësi i Kremlinit, Dmitry Peskov. I pyetur mbi synimin e Rusisë për të pushtuar pjesë të territoreve ukrainase në Odesa, Kharkiv dhe Kherson, Peskov tha se vendimi do të varet nga “vullneti i popullsisë lokale”. “Qëllimi numër një është të mbrohet populli i Donbasit dhe Luhanskut nga ata që po bombardojnë Donetskun, për shembull, edhe tani qe po flasim, dhe po vrasin civilë atje. Dhe e kanë bërë këtë për tetë deri në nëntë vitet e fundit”, tha ai. Peskov tha se Rusia nuk përbën kërcënim për shtetet baltike dhe Finlandën, e cila njoftoi synimin e saj për t’u bashkuar me NATO-N muajin e kaluar, duke thyer traditën për mospjesëmarrje ne aleanca ushtarake prej dekadash, kjo si pasojë e pushtimit rus të Ukrainës.
“Ne jemi të sigurt se anëtarësimi i Finlandës dhe Suedisë në NATO, nuk do të sjellë ndonjë përfitim shtesë për sigurinë e kontinentit europian. Përkundrazi, do të sjellë tension shtesë”, tha ai. Zëdhënësi pranoi se Moska nuk është në një “pozitë komode” pas sanksioneve ekonomike “të pashembullta” nga Perëndimi kundër Rusisë, por pretendoi se “efekti vendimtar” i sanksioneve që Perëndimi kishte shpresuar “nuk ndodhi”. “Tani po ndihemi edhe pak më mirë nga sa mund të mendohet”, tha Peskov, duke shtuar: “Sigurisht, ne i kuptojmë problemet tona. Ne e kuptojmë se në një kohë shumë të shkurtër, do të duhet të kompensojmë një rënie mjaft të konsiderueshme në më shumë se 40%45% në importe”. Ai tha se Rusia po planifikon një “rritje shumë serioze” për prodhimin e saj vendas dhe në infrastrukturë.