Liderët perëndimorë mbështesin kandidaturën e Ukrainës për në BE
Macron: Liderët europianë mbështesin aspiratën që Ukraina të fitojë statusin e kandidatit të menjëhershëm për në BE
Gjermania, Franca, Italia dhe Rumania mbështesin aspiratën e Ukrainës për të marrë statusin e kandidatit për anëtarësim në Bashkimin Europian.
Kancelari gjerman, Olaf Scholz, Presidenti francez, Emmanuel Macron dhe Kryeministri italian, Mario Draghi, mbërritën me tren nga Polonia në Kiev mëngjesin e së enjtes, më 16 qershor, ku më pas atyre u është bashkuar edhe Presidenti rumun, Klaus Iohannis. Presidenti i Ukrainës, Volodymyr Zelenskyy, ka zhvilluar bisedime me liderët europianë dhe më pas mbajtën një konferencë për shtyp në Pallatin Presidencial në Kiev. “Ditë e ngarkuar, takime të rëndësishme. Është kënaqësi të takoj Presidentin Macron, Kancelarin Scholz, Kryeministrin Draghi dhe Presidentin Iohanniss në Kiev. E vlerësojmë solidaritetin tuaj me vendin dhe popullin tonë”, tha Presidenti ukrainas në kanalin e tij “Telegram”, duke postuar fotografi të takimit me liderët e Be-së. Presidenti francez, Emmanuel Macron, tha se liderët e pranishëm në Kiev të enjten, më 16 qershor, janë të gjithë mbështetës që Ukraina të fitojë statusin “e menjëhershëm” të kandidatit për t’u bashkuar me Bashkimin Europian. Zelenskyy tha se pushtimi i Rusisë ishte një sulm ndaj gjithë Europës – dhe vetëm veprimi i bashkuar mund ta ndalonte atë. Ai tha gjithashtu se vizita e liderëve tregoi se Ukraina nuk ishte e vetme në luftën e saj. Ndërkohë, Kancelari gjerman, Olaf Scholz, deklaroi se ai erdhi në Ukrainë me një mesazh të qartë: Ukraina i përket familjes europiane. Ai shton se Gjermania do të mbështesë një vendim pozitiv për anëtarësimin e Ukrainës dhe Moldavisë në BE. Scholz thotë gjithashtu se Gjermania do të vazhdojë të mbështesë Ukrainën për aq kohë sa i nevojitet. Edhe Kryeministri i Italisë, Mario Draghi, ripohoi mbështetjen e tij për aspiratat e Ukrainës për t’u bashkuar me Bashkimin Europian. Ai tha se Italia dëshiron që Ukraina të ketë statusin e kandidatit në BE dhe do ta mbështesë këtë pozicion në takimin e Këshillit Europian të javës së ardhshme. “Populli ukrainas mbron çdo ditë vlerat e demokracisë dhe lirisë që mbështesin projektin europian, projektin tonë”, shtoi ai. “Ne nuk mund ta vonojmë këtë proces. Draghi shton se Italia dëshiron të shohë një fund të konfliktit, por “çdo zgjidhje diplomatike, nuk mund të ndahet nga vullneti i Kievit”. Gjate takimit, Zelenskyy u kërkoi liderëve europianë që të godasin Rusinë me më shumë sanksione, dhe tha se më shumë armë, do të nënkuptojnë çlirimin më të shpejtë të territorit. Por me më shumë armë dhe municione që vijnë nga SHBA dhe Europa Perëndimore, a mund të tërhiqet Ukraina? “Nëse ukrainasit janë në gjendje të kenë armë të mjaftueshme për të nisur një kundërofensivë... atëherë ata
mund të jenë potencialisht në një pozicion për të zmbrapsur rusët”, thotë akademiku Sergey Radchenko, i cili po hulumton historinë e luftës. Kjo mund t’i mundësojë Ukrainës të negociojë “nga një pozicion i fuqisë”, thotë ai. Por ai nuk pret që kjo të ndodhë deri në fund të verës. Katër muaj pas pushtimit të Ukrainës, Rusia ka “interes zero” në bisedimet e paqes, sipas akademikut Radchenko. Çdo shpresë për negociata deri më tani është shtypur për momentin, shton profesori i marrëdhënieve ndërkombëtare në Universitetin “Johns Hopkins”. Ndërkohë, Dmitry Medvedev, një figurë e lartë e Kremlinit, tallet me vizitën e udhëheqësve perëndimorë, duke thënë se “dashamirësve të bretkosave, mëlçisë dhe spagetit” u pëlqen të shkojnë në Kiev me “zero efektivitet”.