Delegacioni gjerman, kush është pjesë e Shoqatës Federale për Zhvillim Ekonomik
Delegacioni Gjerman nga BWA (Agjencia Federale për Zhvillim Ekonomik dhe Tregti www.bwa-deutschland.com) ka në përbërje të tij: Michael Schumann, kryetar i Bordit; Urs Unkau, drejtor; Sami Hyseni, senator për Kosovë, Shqipëri dhe Arabi Saudite; Dr. Manfred Welker, përfaqësues i BWA për Republikën Hessen në Gjermani; shoqëruar nga Fadil Abdullahu, një ekonomist nga Kosova, që jeton dhe vepron në Gjermani. Ky delegacion prej dy ditësh po qëndron në Shqipëri. Pjesë e delegacionit është Sami Hyseni, një afarist i suksesshëm nga Kosova, që jeton për shumë vite në Gjermani (mik personal i z. Irfan Hysenbelliu nga “Hysenbeliu Group”….), njëherësh Senator në BWA për shtetet: Shqipëri, Kosovë, Arabi Saudite, që mori iniciativën të sjellë këtë delegacion shumë të mirëpritur nga Gjermania në Shqipëri
e Kosovë. BWA ka në përbërje rreth 1300 anëtarë të përhershëm, ndërsa ka qasje të shpejtë deri në 10 mijë biznese në mbarë botën. Kjo shoqatë punon fuqishëm dhe në mënyrë profesionale në krijimin e urave lidhëse mes bizneseve gjermane dhe atyre botërore. Shqipëria dhe
Kosova janë dy vende që po zgjojnë kureshtjen e shumë investitorëve gjermanë dhe BWA do të ndihmojë që në rrugë shumë më të drejtpërdrejtë dhe pragmatike të krijojë këto ura lidhjeje. Kryetari i Bordit të Shoqatës Federale për Zhvillim Ekonomik dhe Tregti të Jashtme (BWA),
Michael Schumann, në një konferencë të përbashkët për shtyp pas takimit me kryetarin e Grupit Parlamentar të Partisë Socialiste, Taulant Balla, theksoi se “Shqipëria ka potencial të madh për energjinë dhe burimet natyrore dhe ne duam qe të mbështetemi më shumë në forcat tona, duke sjellë investitorë gjermanë dhe duke parë mundësi strategjike”. Kryetari i Bordit të Shoqatës Federale për Zhvillim Ekonomik dhe Tregti të Jashtme (BWA), Schumann, përmendi se: “Jam surprizuar në mënyrë shumë pozitive, kam vënë re një mikpritje shumë të mirë dhe një vlerësim shumë të madh të Gjermanisë dhe bashkëpunimit me Gjermaninë, është një aset shumë i madh dhe industria gjermane do ta përdorë më shumë këtë mundësi në të ardhmen”. “Jam shumë i lumtur që punojmë për ngritjen e urave, por edhe të fillojmë më konkretisht bashkëpunimin”.