Escobar: Ballkani duhet të jetë pjesë e Be-së!
I dërguari i posaçëm i SHBA: “Nëse ‘Ballkani i Hapur’ mbështet integrimin europian, do të ketë mbështetjen amerikane”
I dërguari i posaçëm amerikan për Ballkanin, Gabriel Escobar, tha se SHBA i mbështesin nismat ekonomike, por me kusht që ato të jenë integruese dhe të përfshijnë të gjitha vendet e Ballkanit Perëndimor.
Në dytën e dytë te forumi i njohur si “Dialogu i Prespës” në Ohër u mblodhën zyrtarë amerikanë e evropianë dhe drejtues të qeverive të shteteve të rajonit të Ballkanit Perëndimor që folën për sigurinë dhe të ardhmen e rajonit. I dërguari i posaçëm i SHBA-SË, Gabriel Escobar, foli për integrimet euro-atlantike si synime të vendeve të Ballkanit Perëndimor, ndërsa tha se në vend të sfidave që janë të shumta do të përqendrohej te mundësitë e unitetit dhe
të vlerave të përbashkëta, shkruan “Zëri i Amerikës”. Zoti Escobar tha se projekti i zgjerimit të Be-së ka një rëndësi të veçantë duke përfshirë ish-kundërshtarët e paktit të Varshavës dhe të NATO-S, ndërsa theksoi se Bashkimi Evropian ka eksportuar qëndrueshmëri dhe paqe. Ai nënvizoi mbështetjen amerikane ndaj nismave evropiane apo rajonale
që synojnë integrimin ekonomik. “Ne e mbështesim Procesin e Berlinit, mbështesim Marrëveshjen për tregun e përbashkët CEFTA, si dhe Ballkanin e Hapur përderisa ai përqendrohet tek integrimi evropian dhe nëse mbetet i hapur për të gjitha shtetet”. Ai tha se 70 për qind e ekonomisë së Ballkanit Perëndimor lidhet me tregun evropian dhe proceset ekonomike duhet të jenë në kuadër të sundimit të ligjit, tregjeve të hapura dhe transparente e gjithëpërfshirëse. “Nëse ‘Ballkani i Hapur’ i plotëson këto kushte, do ta ketë mbështetjen amerikane”, tha zoti Escobar. I dërguari britanik për Ballkanin, Stuart Peach, tha se ndikimi rus nuk është një gjë e re. “Mjetet mund të jenë të reja;
Zhurma e krijuar nga tragjedia e luftës së paligjshme në Ukrainë dhe për popullin e Ukrainës nuk kanë të ndalur. Dhe ne duhet të jemi shumë syçelë”, tha zoti Peach duke nënvizuar rrugën e nevojshme të integrimit të këtij rajoni në proceset euro-atlantike. Ai tha se Rusia ka militarizuar çështjet e energjisë dhe ekonomisë. Kryeministrja serbe, Ana Bërnabiç, në lidhje me nismën “Ballkani i Hapur”, tha se përkundrazi, nuk bie ndesh me procesin e Berlinit, ndërkohë që partnerët, sipas saj, janë të lirë të zgjedhin cilat nisma janë më të mira për ata. Në tribunë ishte paraparë të fliste edhe Kryeministri i Kosovës, Albin Kurti, por ai nuk erdhi në Ohër për shkak të takimit me veteranët e ish-ushtrisë Çlirimtare të Kosovës. Ministrja e Jashtme, Donika Gërvalla, tha se Republika e Kosovës po bën përpjekje të afrohet sa më pranë strukturave të NATO-S, duke nënvizuar se kjo rrugë nuk është e lehtë për shkak se katër vende anëtare të Aleancës nuk e njohin pavarësinë e Kosovës. Ndërkohë, Presidentja Vjosa Osmani tha se: “Putini ka folur shumë për Kosovën, për Ballkanin Perëndimor dhe qartazi ai dëshiron të sajojë tregime të rreme dhe krahasime të rreme. Por vetëm një krahasim mund të bëhet: atë që Putini po bën sot, Millosheviçi po bënte para disa dekadash në rajonin tonë duke kryer krimet më të këqija kundër njerëzimit dhe gjenocid”. Kryeministri maqedonas, Dimitar Kovaçevski, tha se: “Vazhdojmë të punojmë për evropianizimin e sistemit të përgjithshëm të shtetit; vlerat dhe demokracitë evropiane i zbatojmë brenda vendit. Jemi pjesë e familjes evropiane dhe i ndajmë vlerat e njëjta. Nuk ka alternativë tjetër për Maqedoninë e Veriut përveç integrimit evropian”.