Mediu: Ka ardhur koha për sistem proporcional kombëtar
Kreu i Partisë Republikane, Fatmir Mediu, në Komisionin e Posaçëm të Reformës Zgjedhore propozoi sistem proporcional kombëtar me lista të hapura për zgjedhjet e ardhshme. “Sistemi aktual është një vrastar i pluralizmit politik. Ka tentuar gjithmonë për të eliminuar pluralizmin, për t’iu hequr edhe mundësinë e organizimit dhe funksionimit normal politik dhe të partive të mëdha. Ka ardhur koha që t’u referohemi sistemeve që janë më funksionale, më produktive, më me pak konflikte, me zgjedhje që i kanë nxjerrë përfundimet shpejt dhe kanë sjellë qeverisje më të stabilizuar, që bazohet në radhë të parë te zgjedhjet e lira dhe të ndershme. Sistemi proporcional kombëtar me lista të hapura i jep mundësinë çdo subjekti të konkurrojë bazuar në atë që ka dhe as në marrëveshje dhe asnjë shpërfillje të interesave politike të grupeve të caktuara”, u shpreh Mediu. Ndërkohë, deputeti demokrat Dashnor Sula e vuri theksin te ndryshimet kushtetuese të 2008-ës, që, sipas tij, kishin synim të frenonin të inkriminuarit në Parlament, por që në fakt bënë të kundërtën. “Jemi katandisur sot në këtë gjendje ku deputetët janë të emëruar, deputetë që kanë ardhur si të fortë.
Edhe në 25 prill të 2021, në Kuvend vjen grupi i të fortëve, grupi i biznesmenëve të dyshimtë që blejnë vota në zonat e tyre elektorale dhe të korruptuarit e administratës që vjedhin në 4 vite dhe ato para i shfrytëzojnë për të blerë mandatin. Këtu ka ngelur administrate që voton sipas pushtetit dhe pjesa që blihet. Ka edhe nga opozita që blen votues në 25 prill, por ka shumë më shumë maxhoranca. Ishte 50 euro vota, shkoi 500 euro. Janë konstatime të organizatave të huaja, janë procedime penale që kanë filluar”, tha Sula.