DEPUTETI I PD: JEMI VENDI ME ÇMIMIN MË TË LARTË TË KARBURANTIT

Deputeti i Partisë Demokratike, Arbi Agalliu, ka reaguar në lidhje me rritjen e çmimit të naftës, i cili të premten preku rekordin historik prej 265 lekë për litër. Përmes një postimi në “Facebook”, ai shkruan se me këtë ecuri, shumë shpejt shtresa e mesme dhe shtresat në nevojë do të jenë në kolaps total. Sipas deputetit të djathtë, qeveria nuk ka marrë asnjë masë që së paku të heqë përkohësisht disa nga taksat mbi karburantin që rëndojnë mbi xhepat e qytetarëve. “265 lekë për litër. Ky është çmimi i naftës sot që bordi vendosi. Asnjë masë apo reagim për të hequr apo ulur së paku përkohësisht disa nga taksat e shumta që paguajmë në çdo litër karburant që blejmë. Me këtë ecuri, shumë shpejt, sidomos shtresat në nevojë dhe shtresa e mesme, do të jenë në kolaps financiar. Jemi vendi me çmimin më të lartë të karburantit jo vetëm në rajon, por edhe më tej”, shkroi në rrjetet sociale Agalliu. Të premten, Bordi i Transparencës vendosi rritjen e mëtejshme të çmimit të naftës, me 7 lekë, nga 258 lekë që ishte një litër, në 265 lekë. Çmimet e reja do të jenë në fuqi deri në mbledhjen e radhës.