Dritat, rreth 20 mijë lekë përfitimi vjetor për pensionistët
Vlera e kompensimit, më e lartë për ata që kanë dalë në pension para 2015 Dokumentet që duhet të dorëzohen nga pensionistët për të përfituar nga skema e rimbursimit të energjisë
Është jo pak, por rreth 20 mijë lekë në vit përfitimi për pensionistët, nga skema e kompensimit të dritave. Për të mbuluar efektet e kësaj skeme, vetëm për pensionistët, nga arka e Institutit të Sigurimeve Shoqërore dalin rreth 15 milionë dollarë.
Konkretisht, janë 648 lekë që pensionistët kryefamiljarë marrin çdo muaj në formë rimbursimi për dritat pas heqjes së fashës në 2015-ën. Por ky nuk është i vetmi përfitim. Vlera e kompensimit për këtë kategori shkon 1288 lekë në muaj, kjo pasi ndër vite janë miratuar disa vendime për kompensimin e energjisë elektrike. Por, ky përfitim është edhe më i lartë për pensionistët që kanë dalë në pension para 2015-ës. “Kompensimi jepet sipas tri VKM-VE të ndryshme. Në masën 500 lekë, sipas vendimit të parë; 140 lekë, sipas vendimit të dytë dhe 648 lekë, sipas VKM-SË së fundit, ose në total 1288 lekë në muaj. Për pensionistët që kanë dalë në pension para 2015-ës, është edhe një kompensim tjetër prej 350 lekësh dhe në total për një familje pensionistësh të vetëm, shuma totale e kompensimit është 1638 lekë në muaj”, bëhet me dije nga Instituti i Sigurimeve Shoqërore. Janë mbi 140 mijë pensionistë që çdo muaj, bashkë me pensionin, marrin edhe kompensimin për dritat. Pjesë e skemës mund të bëhen edhe të moshuarit që dalin rishtazi në pension.
Por vlen të theksohet se për të qenë përfitues, duhet të përmbushen disa kritere. Kështu, për të marrë kompensimin vjetor në vlerën e rreth 20 mijë lekëve, duhet që pensionisti të jetë kryefamiljar, të jetë i vetëm ose pjesëtarët e tjerë të familjes të jenë pensionistë (bashkëshorti/ja) ose të jenë të papunë punëkërkues. Pra, duhet që të mos ketë asnjë person në punë. Për të vërtetuar këtë, duhet të paraqesë certifikatën familjare, ku janë të shënuar pjesëtarët e familjes. Në rastin kur janë dy pensionistë, pra, burrë e
grua, kompensimin e përfiton vetëm njëri prej tyre. Kjo pasi dokumenti tjetër që duhet është libreza e dritave në emër të aplikuesit për të marrë kompensimin. Por edhe nëse përfituesi plotëson kriteret, kompensimi nuk përfitohet nëse nuk ka konsum të energjisë elektrike dhe paguhet vetëm tarifa fikse e shërbimit. Për të përfituar shtesën, pensionistët duhet të aplikojnë online në portalin “e-albania”. Ndërkohë që dokumentacioni i nevojshëm mund të dorëzohet përmes shërbimit postar në adresë të drejtorisë rajonale të sigurimeve. Veç formularit, duhet të dorë-zojnë një fotokopje të kartës së identitetit, kopje e kontratës me Operatorin e Shpërndarjes së Energjisë në emrin e vet, kopje e librezës ose faturës së likuiduar që vërteton që e paguajnë energjinë e konsumuar, si dhe certifikatë familjare për të vërtetuar që janë kryefamiljarë të vetëm ose kanë persona të tjerë të familjes në moshë pune.