Sekuestro 14 apartamenteve e 5 ndërtime pa leje në Durrës
Një hetim i nisur në vitin 2012 ka rezultuar me sekuestrimin e 14 apartamenteve dhe pesë ndërtimeve pa leje në qytetin e Durrësit. Prokuroria e këtij qyteti, me një vendim të marrë më 3 qershor të këtij viti, thotë se apartamentet dyshohet të jenë blerë me para të jashtëligjshme. Në kuadër të çështjes penale nr. 1674, viti 2012, për veprën penale “Pastrimit të produkteve të veprës penale ose veprimtarisë kriminale”, Prokuroria thotë se apartamentet ishin regjistruar në periudha të ndryshme kohore nën emra të tjerë dhe jo të pronarëve. Në njoftimin e
Prokurorisë nuk përmenden emrat e personave që i përkasin këto, ndërsa jepen të dhëna të detajuara për vendndodhjen e këtyre apartamenteve dhe hapësirën përkatëse të tyre. Pasuritë e vendosura nën sekuestro ndodhen në zonën e “Mbikalimit të Plepave” në drejtim të Shkozetit. Në shkallën 1 të pallatit në fjalë prej 8 katesh, ndodhen gjashtë prej apartamenteve të sekuestruara. Sipas Prokurorisë, këto apartamente janë regjistruar në
Hipotekë më 12 gusht të vitit 2008. Ndërkohë, në shkallën 2 të këtij pallati, janë sekuestruar me urdhër të Prokurorisë dhe të konfirmuar nga Gjykata e Shkallës së Parë të Durrësit, 8 apartamente. Njësitë e sekuestruara janë kryesisht banesa 1+1, me një sipërfaqe mesatare rreth 80 metra katrorë.
NDËRTIMET PA LEJE
Ajo që bie në sy në dosjen e Prokurorisë së Durrësit janë edhe disa ndërtesa të ndërtuara pa leje, për të cilat kërkohet të ndërpritet procesi i legalizimi. Ndryshe nga apartamentet, Prokuroria thotë se këto banesa janë regjistruar në emër të disa shtetasve në lidhje familjare midis tyre. Objektet janë ndërtuar në zonën e ishkënetës dhe në Arapaj rreth 20 vite më parë dhe janë deklaruar për legalizimin në vitin 2006, kur edhe nisi fillimisht procesi i vetëdeklarimit për mijëra ndërtesa në të gjithë Shqipërinë. Bëhet fjalë për gjashtë banesa, kryesisht njëkatëshe. Megjithëse rezultojnë të dhëna të pakta se kujt i përkasin këto pasuri të sekuestruara, njëra prej tyre është në pronësi të shtetasit Asjan Buçeza, lindur dhe banues në Shinavlash të Durrësit. Pasuritë e tjera rezultojnë në emër të të afërmve të tij. Prokuroria ka urdhëruar institucionet përkatëse që të mos lejohet kryerja e transaksioneve për këto pasuri dhe as regjistrimi i tyre në Agjencinë e Kadastrës.