“Djali i ministrit të Brendshëm, Bledi Çuçi, i hetuar në Itali”
Nëna e Endi Çuçit reagon kundër Berishës, Zhaklina Peto: Nuk kam probleme me drejtësinë, ja e vërteta
Ish-kryeministri Sali Berisha ka bërë publik sot një denoncim, që sipas tij, autoritetet italiane kanë vënë nën hetim djalin e ministrit të Brendshëm, Bledi Çuçi, Endi Çuçi.
Duke iu referuar denoncimit të qytetarit dixhital, Berisha shkruan se Endi Çuçi është vendosur nën hetim, duke u akuzuar si i përfshirë në kontrabandën e ilaçeve. Sipas asaj që shkruan ishkryeministri është bërë ndërhyrje e fuqishme për lirimin e tij nga burgu. Po ashtu, në dokumentet e publikuara nga Berisha, përmendet edhe Zhaklina Peto, gruaja e parë e ministrit Çuçi. Dokumentet e Italisë tregojnë se lista e shtetasve shqiptarë të përfshirë në kontrabandën e ilaçeve gjatë periudhës së Covid, është më e gjatë. Aty del emri i juristes së njohur Zhaklina
Peto, ish-kandidate për në KED, emri i bashkëshortit të saj, mjekut pediatër në QSUT, Aurel Vula.
DENONCIMI I BERISHES, SUPERSKANDAL!
Vendoset nën hetim në Itali djali i Bledi Çuçit, ministrit të Brendshëm të familjes Endi Çuçi, si anëtar i mafies që kontrabandonte ilaçe dhe të sëmurëve! Punonte në KLGJ! Ndërhyrje të fuqishme për lirimin e tij! Mafie dhe vetëm mafie!
Lexoni mesazhin e qytetarit dixhital. “Përshëndetje doktor. Kam disa dokumente me rëndësi, të cilat po jua nis. Bëhet fjalë për një masë sigurie
të Gjykatës italiane, ku i përfshirë është djali i Blendi Çuçit, Endi Çuçi, në kontrabandë ilaçesh dhe pacientësh shqiptarë që të merrnin karta shëndeti të falsifikuara në Itali në kohën e Covid. Nuk e ka asnjë media vetëm ne. Një miku im gazetar ma dha në mënyrë konfidenciale, të cilat i siguroi nga gazetarë italianë. Materialet i kam.
Më poshtë po ju nis dokumentin e Gjykatës, ku përmendet djali i Blendi Çuçit nga martesa e tij e parë me Zhaklina Peton, e dalë në përgjimet italiane. Bashkëngjitur ju nis të gjithë materialin, median tonë e cila e publikoi rastin, por nuk e kanë përmendur emrin e djalit të Blendi Çuçit dhe median italiane. Kredencialet e tij dhe punësimin në KLGJ. Me poshtë dokumentet:
1. Masa e sigurisë së Gjykatës së Milanos.
2. Lajmet në mediat italiane. Përgjimet në dosjen e Gjykatës italiane
REAGIMI I ZHAKLINA PETOS
Por në një reagim, Zhaklina Peto hedh poshtë të gjitha akuzat duke thënë se ato janë të pavërteta. Juristja sqaron se as ajo dhe as djali i saj nuk kanë probleme me drejtësinë italiane, “pavarësisht përmendjes
në mënyrë rastësore në një hetim të drejtësisë italiane që s’ka të bëjë fare me ne”, thekson Peto.
“Unë kam qenë në Itali për t’u kujdesur për nënën time të sëmurë gjatë vitit 2021, e cila fatkeqësisht ndërroi jetë në 3 maj 2021 në Itali. Në datën 4 maj 2021 im bir erdhi në Itali dhe së bashku u kthyem në Shqipëri për t’i bërë nënës nderimet e fundit”, thuhet ndër të tjera në reagimin e Zhaklina Petos.
“Me shqetësim shumë të madh dhe tepër e indinjuar, dua të përgënjeshtroj të gjitha akuzat e pavërteta dhe të shëmtuara, të cilat kanë dalë në media dhe që drejtohen ndaj meje personalisht dhe djalit tim Endi Çuçi.
Që në fillim dua t’ju sqaroj se as unë dhe as djali im nuk kemi probleme me drejtësinë italiane, pavarësisht përmendjes në mënyrë rastësore në një hetim të drejtësisë italiane, që s’ka të bëjë fare me ne. Kjo është e cilësuar fare qartë edhe në fashikullin e hetimit, të cilin e keni bashkëlidhur dhe po e citoj:
…”Në shqyrtimin e fakteve që lidhet me paragrafin në fjalë, bëjmë me dije që në fillim se elementet që kemi në dispozicion na ndalojnë, aktualisht, që të përcaktojmë ndonjë veprim me rendësi penale, në ngarkim të disa prej personave të përmendur (SOTIRI ROMEO, PETO ZHAKLINA, XHABAFTI SOKOL dhe CUCI ENDI), duke qenë se nga aktet e hetimit nuk figuron asnjë element që t’i lërë vend ngritjes së akuzave në të ardhmen”…
Unë kam qenë në Itali për t’u kujdesur për nënën time të sëmurë gjatë vitit 2021, e cila fatkeqësisht ndërroi jetë në 3 maj 2021 në Itali. Në datën 4 maj 2021, im bir erdhi në Itali dhe së bashku u kthyem në Shqipëri për t’i bërë nënës nderimet e fundit.
Askush nuk ka të drejtë që për qëllime tërësisht politike të na linçojë dhe dënojë publikisht. Unë iu kërkoj vetëm të mos hidhni baltë mbi djalin tim, një i ri i sapodiplomuar që sapo ka filluar të ecë në jetë dhe ndryshe nga çfarë shpifet nga puseta dixhitale, punon prej shtatorit 2021 për EPO në Mynih, Gjermani (The European Patent Office – Zyra Europiane e Markave dhe Patentave). Faleminderit!”