“Shqiptarët janë të prapambetur”, deklarata e Adelina Tahirit që inatosi rrjetin
Adelina Tahiri prej vitesh “ka një luftë” me ndjekësit e saj, për shkak të bashkëshortit disa vite më të madh. Ajo dhe Serjoza Markov prej vitesh kanë një martesë të shëndetshme, por duket se ndjekësit nuk e lënë të qetë, si për faktin se avokati i pasur është më i madh në moshë, ashtu edhe për faktin se nuk është shqiptar. Lidhur me këtë temë, këngëtarja, e cila prej kohësh është tërhequr nga skena muzikore, ka sqaruar njëherë e mirë pse ka zgjedhur për bashkëshort një shtetas të huaj. “E mora burrin maqedonas, sepse shqiptarët janë të prapambetur”. Kaq ka mjaftuar që rrjeti të “ziejë” edhe më shumë, duke vijuar me komente negative në profilin e Adelinës. Më herët, vetë këngëtarja në një intervistë ka shprehur të gjithë indinjatën e saj me komentuesit që nuk e lënë të qetë. “Nuk e kuptoj tipin e këtyre njerëzve! Realisht nuk meritojnë vëmendje. Po duhet ta them: Po të ishte martesa sikur zgjedhjet apo partitë, do t’ju kuptoja plotësisht! Nuk e martova për t’i pëlqyer dikujt burri im! U martova se e desha! Shumë e thjeshtë. Pse juve duhet t’ju pëlqejë burri im, s’e kuptoj!”, ka thënë më herët këngëtarja. “Kur burri më propozoi, i thashë që më duhet të zgjedh mes teje dhe babit e vëllait, sepse nuk e mendoja se familja ime do ta pranonte. Burri më tha se kur familja ta shohë sa je e lumtur, do ta pranojë. Ai më dha vullnet dhe dashuria e madhe që kisha, më bëri të përballoj çdo gjë. Babi çonte njerëz të më shihnin ku jam, me kë jam, pasi kishte dyshuar, sepse e njeh fëmijën e vet. I tregova që jam me një njeri që nuk i përket fesë time, nuk i takon kombit tim, por i takon zemrës time. I thashë dua të kem përkrahjen tënde. Babi më tha jam me ty deri në vdekje. Kur vendosi babi të takohej me burrin, burri e mori në telefon dhe i tha të takohen. I shkrova personit të sigurimit dhe i thashë të më informonte çfarë do të ndodhte. Isha në stresin më të madh në jetë. Personi i sigurimit më shkruante që babi me burrin po qanin. U habita. Ata nga emocionet kishin filluar të qanin. Tani çdo fundjavë babi dhe ai shkojnë për peshkim, se e kanë hobi dhe shkojnë aq mirë bashkë, sa nuk mund ta besoj”, ka thënë ajo.