Mbledhja, Berisha: Rama në Kosovë duke mos njohur gjenocidin serb
Ish-kryeministri Sali Berisha, teksa komentoi dje mbledhjen e përbashkët mes dy qeverive në Prishtinë, akuzoi Edi Ramën se shkoi në Kosovë duke mos njohur dhe duke mohuar gjenocidin serb ndaj Kosovës. “Çdo mbledhje e përbashkët midis qeverisë së Shqipërisë dhe Kosovës është akt që duhet përshëndetur. Por Rama nëse do të njihte minimumin e minimumit të respektit për qytetarët e Kosovës, martirizimin e tyre në më shumë se 150 vitet e fundit, duhej të shkonte këtë herë në Kosovë duke pas njohur gjenocidin ciklik serb në Kosovë, duke pas njohur infanticidin. Janë 1400 engjëj, vogëlushë, qenie të pafajshme, të cilët u vranë, u therën, u dogjën, vetëm për fajin e vetëm se kishin prindër shqiptarë. Në këtë aspekt, mohimi që ai i bën gjenocidit ciklik serb në Kosovë që fillon nga gjysma e dytë e shekullit të 19-të e përfundon me operacionin ‘Patkoi’, është një aktakuzë shumë e rëndë për karakterin, për ndërgjegjen e tij kombëtare, por edhe për vlerat, qytetarinë e tij”, theksoi z. Berisha. T’i mohosh këto, sipas tij, është njëlloj si të shkelmosh mbi shpirtrat, gjakun e tyre. “Kur këta janë shqiptarë, kjo është forma më e lartë e tradhtisë kombëtare. Unë mund të kem shumë probleme të tjera për të shtruar sot para jush, por zgjodha vetëm këtë, sepse edhe marrëveshjet, unë e ndoqa, recitimet e përfaqësuesve të qeverisë shqiptare. Në një kohë kur qytetarët presin marrëveshje dyshtetësinë, apo shtetësinë sipas dëshirës, kjo është marrëveshja që presin shqiptarët. Por këtë, krahas njohjes së gjenocidit, kjo do të jetë marrëveshja e parë, përveç heqjes së taksës së Rrugë së Kombit, që do të firmoset nga qeveria e ardhshme e Pdsë”, tha Berisha. Ai deklaroi se një nga dy vendimet e para të Pd-së në qeveri do të jetë heqja e taksës së Rrugës së Kombit. Sipas tij, qytetarët presin marrëveshjen për dyshtetësinë. “Ndaj edhe unë mund të kem shumë probleme tjera për të shtruar sot në marrëdhëniet mes Shqipërisë e Kosovës, por zgjodha vetëm këtë, sepse edhe marrëveshjet, unë i ndoqa recitimet e përfaqësuesve të qeverisë shqiptare, në një kohë kur shqiptarët presin një marrëveshje, dyshtetësinë, apo shtetësinë sipas dëshirës, kjo është marrëveshja që presin shqiptarët, por këtë natyrisht, krahas njohjes së gjenocidit, do të jetë marrëveshja e parë, përveç heqjes së taksës në Rrugën e Kombit, që do të firmoset nga qeveria e ardhshme e Pd-së”, u shpreh Berisha.