Ishte punësuar në Ministrinë e Jashtme, dorëhiqet motra e Dumanit:jamnërrezikpërjetën
“Jam në një detyrë tërësisht teknike, pa akses në dokumentacion të klasifikuar” Zbardhet letra e plotë: Jam baltosur në mënyrë të padrejtë e rrezikohem çdo orë e më shumë. Kam kontribuar në punë
Xhuliana Dumani, motra e Nuredin Dumanit, të arrestuarit për disa vrasje me pagesë në vend ditët e fundit, që rezultonte e pajisur me certifikatë sigurie në Ministrinë e Jashtme, ka dhënë dorëheqjen nga detyra e saj. Përmes një letra, të cilën gazeta “Panorama” e disponon, Xhuliana jep dorëheqjen e parevokueshme nga detyra, por hedh poshtë pretendimet se ajo përbën rrezik për sigurinë kombëtare. Në letrën e saj, motra e serialkillerit sqaron të vërtetën e jetës së saj, ku thotë se është përpjekja për të ndërtuar një jetë normale, larg profilit të vëllait dhe me dëshirën e një vajze 24-vjeçare, arsimuar me rezultate shumë të mira. Ndër të tjera, ajo shkruan në dorëheqjen e saj se po baltoset në mënyrë të padrejtë dhe po i rrezikohet jeta me ekspozimin e vendit të saj të punës apo edhe fotove personale. Motra e Nuredin Dumanit thotë se gjatë ushtrimit të detyrës së saj prej pak kohësh, ka dhënë kontribut në një detyrë tërësisht teknike, dhe pa asnjë lidhje për sa pretendohet në media, për akses në dokumentacion të klasifikuar. “Të nderuar, prej së shtunës, 18 qershor 2022, jam bërë objekt i keqinformimi të opinionit publik nga disa media, mbi rrezikun që unë si individ paraqes për sigurinë kombëtare dhe institucionin që punoj prej pak muajsh si staf teknik. Si rezultat i këtyre publikimeve të pavërteta, prej 48 orësh jam në rrezik për jetën dhe e ekspozuar publikisht, jo vetëm unë, por edhe kolegë me të cilët punoj prej pak kohësh, e për të cilët do të ruaj vlerësimin tim maksimal. E vërteta ime e vetme është përpjekja për të ndërtuar një jetë normale, larg profilit të vëllait tim, me dëshirën e një vajze 24-vjeçare, arsimuar me rezultate shumë të mira. Për shkakun tim, prej 48 orësh po akuzohet padrejtësisht edhe institucioni ku unë
prej pak kohësh kam dhënë kontributin tim, në një detyrë tërësisht teknike, pa asnjë lidhje për sa pretendohet në media, për akses në dokumentacion të klasifikuar. Jam baltosur në mënyrë të padrejtë e po vijoj të baltosem e të rrezikohen çdo orë e më shumë, për shkak të publikimit të të dhënave të mia personale, fotografive, vendit të punës etj., duke ekspozuar seriozisht edhe persona të tjerë, ‘faji i vetëm’ i të cilëve është ndarja e orëve të punës me mua. Duke i kërkuar ndjesë institucionit që nuk i kam kryer asnjëherë, që për shkakun tim është sulmuar për ushtrim detyrash, më lejoni të jap dorëheqjen e parevokueshme dhe të menjëhershme nga detyra. Me respekt, Xhuljana Dumani”, thuhet në letrën e Xhuliana Dumanit. Në një bisedë me gazetaren Klodiana Lala, ajo thotë se është punësuar sipas ligjit. “Aplikova online në kuadër të programit Kombëtar të Praktikave të Punës. Fitova të drejtën për të kryer praktikën 3-mujore pranë Ministrisë së Jashtme. Praktikën e nisa me 16 gusht 2021. Kam punuar shumë dhe u përzgjodha. Më 25 janar 2022 më është lidhur kontrata 1-vjeçare e punës. Jeta ime po merr fund. Nuk kam bërë asgjë të gabuar,
vëllezërit e mi zgjodhën atë jetë, unë zgjodha të bëja diçka tjetër”, i ka thënë Xhuliana
gazetares Lala. Motra e Nuredin Dumanit, i cili tashmë cilësohet si i penduar i drejtësisë
dhe që me rrëfimet e tij ka çuar në zbulimin e emrave të botës së krimit, ka qenë kryefjalë
e mediave, pasi u tha se ajo ishte pajisur me një certifikatë sigurie nga NATO.