MEJP: Motra e Dumanit, specialiste në Drejtorinë e Shërbimeve “Xhuliana Dumani nuk kishte akses në dokumentet e klasifikuara”

Ministria e Jashtme ka thënë se motra e Nuredin Dumanit, Xhuliana Dumani, e të penduarit të drejtësisë, ishte punësuar në këtë dikaster dhe është pajisur me certifikatë sigurie duke deklaruar se ajo nuk ka pasur asnjëherë akses në dokumente të klasifikuara. Përmes një njoftimi për mediat, MEPJ ka sqaron se Dumani është përzgjedhur fillimisht për të kryer praktikën 3-mujore në ministri. MEJP tha se me motrën e Nuredin Dumanit është lidhur një kontratë 1vjeçare pune pas përfundimit të praktikës, pasi ajo ka dorëzuar të gjitha dokumentet e kërkuara të sigurisë dhe ka kaluar filtrat e institucioneve përkatëse. “Emri i znj. Xh. D. ka qenë pjesë e listës që kanë aplikuar për këtë program, sjellë në MEPJ nga Ministria e Arsimit. Pas marrjes së listës, ngrihet një komision që bën përzgjedhjen e studentëve, bazuar në metodologjinë e përcaktuar në VKM përkatëse dhe më tej, bazuar te buxheti dhe kërkesat e drejtorive përkatëse të MEPJ, përzgjidhen një numër i caktuar studentësh, për të cilët lidhen kontratat e punës me afat të caktuar 1-vjeçar. Emrat e praktikantëve sugjerohen nga drejtoritë përkatëse ku ata kanë kryer praktikat e punës. Pra, znj. Xh. D. ka hyrë në MEPJ si pjesë e një programi, ku përzgjedhja bazohet vetëm në rezultatet e studentëve dhe që synon krijimin e hapësirave për studentët më të mirë në administratën publike. Znj. Xh. D. e ka kryer praktikën në gusht 2021 dhe në përfundim të praktikës, për shkak të vlerësimit të performancës së saj nga drejtoria, është lidhur kontrata e punës me afat të paracaktuar 1-vjeçar deri në 31.12.2022, si specialiste në Drejtorinë e Shërbimeve të Brendshme, Sektori i

Shërbimeve. Znj. Xh. D. nuk ka qenë për asnjë moment e punësuar në kabinetin e MEPJ. Për punësimin e znj. Xh. D. është kërkuar sipas ligjit, dëshmia e penalitetit nga autoritetet përkatëse, e cila ka rezultuar e pastër. Në përputhje me ligjin, ashtu si për çdo punonjës tjetër të MEPJ, edhe për znj. Xh. D. është kërkuar certifikata e sigurisë nga DSIK. Kjo certifikatë është, pas dëshmisë së penalitetit, një tjetër filtër nëpër të cilin kalon çdo punonjës i MEPJ. Duam të sigurojmë publikun, por edhe mediat e interesuara, që në asnjë moment zonja në fjalë nuk ka pasur akses në informacion të klasifikuar e aq më pak në informacion të klasifikuar të NATO. Informacionet e klasifikuara në MEPJ trajtohen me rregulla e procedura të posaçme dhe vetëm një numër i kufizuar punonjësish kanë akses në to”, thuhej në reagimin e Ministrisë së Jashtme.