Balla: E drejta e Kuvendit për të hetuar s’është e pakufizuar
PS rrëzoi kërkesën e PD për komisionin hetimor për investimet strategjike “Në kërkesë nuk ka fakt dhe indicie. Mendoj që opozita ka plot instrumente të kontrollit parlamentar për të adresuar shqetësimet e saj”
Maxhoranca rrëzoi për herë të tretë kërkesën e 35 deputetëve të opozitës për ngritjen e një komisioni hetimor për investimet strategjike.
Kryetari i Grupit Parlamentar të Ps-së, Taulant Balla, sqaroi arsyet pse u rrëzua kërkesa e Alibeajt dhe tha se e drejta e Kuvendit nuk është e pakufizuar për të hetuar, pavarësisht se kërkesa është e firmosur nga 35 deputetë. Gjatë një deklarate për mediat pas mbledhjes së Konferencës së Kryetarëve, Balla u shpreh se kërkesa nuk kishte fakte dhe indicie që Kuvendi të investohej në këtë çështje. Kreu i Grupit të Pssë sqaroi se opozita ka plot instrumente të tjera për të kontrolluar punën e Parlamentit, duke shtuar se nuk është objekti i një komisioni hetimor një kërkesë ku kërkon të hetosh të gjitha kontratat ose të gjithë hapësirën e ligjit. “Konferenca e Kryetarëve në shumicë konstatoi se kërkesa e 35 deputetëve ka probleme të qasjes kushtetuese ose përputhjes me Kushtetutën. Kërkesa nuk ka mbështetje në vendimmarrjet e Gjykatës Kushtetuese, e cila
ka sqaruar rastet kur ngrihen këto komisione hetimore parlamentare. Nuk kërkohet hetim i një çështjeje të veçantë dhe mungojnë indiciet që justifikojnë një komision të tillë. Kam bërë një sqarim të plotë lidhur me arsyet për refuzimin e kësaj kërkese dhe mendoj se opozita ka plot instrumente të tjera të kontrollit parlamentar, për të adresuar shqetësimet e veta, por në kërkesë nuk ka as fakt, as
indicie që Kuvendi të investohet për ngritjen e një komisioni hetimor parlamentar. Tashmë ka një praktikë të konsoliduar të vendimeve të GJK. Pa u mohuar të drejtën 35 deputetëve, e drejta e Kuvendit për të hetuar nuk është e pakufizuar. Ajo është e kufizuar dhe duhet të përqaset me nevojën e identifikimit të indicieve dhe fakteve konkrete. Të vish dhe të kërkosh të hetosh të gjitha kontratat ose hapësirën e zbatimit të ligjit, nuk mund të jetë objekt i një komisioni. Për më qartë, të enjten, në Kuvend do të parashtroj të
gjitha arsyetimet e një karakteri strikt kushtetues të refuzimit të kësaj kërkese”, tha Balla.
Kreu i Grupit të Ps-së zbuloi edhe një nga temat e diskutimit gjatë mbledhjes me dyer të mbyllura, të krerëve të grupeve parlamentare dhe kryetarëve të komisioneve. Ai deklasoi se dje është diskutuar edhe nevoja për rishikimin e ligjit për ngritjen dhe funksionimin e komisioneve hetimore, duke shtuar vendimet plotësuese të Gjykatës Kushtetuese. “Unë besoj që edhe vetë deputetët e
opozitës e dinë fare mirë që kërkesa e tyre nuk është në përputhje me ligjin dhe kompetencat kushtetuese të Kuvendit për rastin konkret. Parimi i ndarjes së pushteteve është i shenjtë. Ne kemi diskutuar në Konferencën e Kryetarëve nevojën për rishikimin e ligjit për komisionet hetimore për të transpozuar në këtë ligj të gjitha vendimmarrjet e Gjykatës Kushtetuese që kanë pasuruar gjithë jurisprudencën e nevojshme për ngritjen dhe funksionimin e komisioneve parlamentare.