Goditet grupi i kultivimit të drogës, kapen qindra kilogramë
Operacioni “Vallas” shpall në kërkim edhe tetë persona të tjerë Nga Tirana në Shkodër për t’u kujdesur për bimët, midis 6 të arrestuarve edhe dy gra. Kush është “shefi” parcelave të kanabisit
Gjashtë persona kanë përfunduar në pranga dhe tetë të tjerë janë shpallur në kërkim pas një operacioni të gjerë antikanabis në zonën e Shkodrës. Operacioni i koduar “Vallas”, në fshatin me të njëjtin emër, sekuestroi edhe një sasi të madhe kanabisi prej 246 kilogramësh.
ARRESTIMET
Kanë qenë hetimet e Policisë, të koordinuara me Prokurorinë e Shkodrës, ato që bënë të mundur kultivimin e sasive të mëdha të drogës dhe trafikimin e tyre në fshatin Vallas. Për këtë arsye, në pranga përfunduan shtetasit: Ardjan Tahiri, Besmir Rexhepi, Hekuran Myrtja, Liljana Çopani, Arben Uruçi dhe Danjela Hasani. Kjo e fundit është arrestuar nga Policia e Tiranës disa orë pas operacionit në Shkodër, ndërsa shkonte për të punuar në parcelat me kanabis. “Në vijim të kontrolleve masive në të gjithë territorin, me qëllimin parandalimin, evidentimin dhe goditjen e veprimtarive kriminale në fushën e narkotikëve, në kuadër të një hetimi disaditor, nën drejtimin e Prokurorisë pranë Gjykatës së Rrethit Gjyqësor Shkodër, si dhe falë një pune të mirorganizuar të të gjitha strukturave policore të DVP Shkodër, Komisariati i Policisë Shkodër, në bashkëpunim me seksionet për Hetimin e Krimeve kundër Narkotikëve dhe Trafiqeve të Paligjshme të kësaj DVP-JE, organizuan dhe finalizuan me sukses operacionin policor antikanabis të koduar ‘Vallas’. Si rezultat i këtij operacioni u arrestuan ne flagrancë shtetasit A. T., 28 vjeç, banues në fshatin Oblikë, Shkodër; B. R., 26 vjeç, banues në fshatin Oblikë, Shkodër; H. M., 51 vjeç, banues në Vallas, Shkodër; L. Ç., 34 vjeçe, banuese në Milot, Lezhë; A. U. 48 vjeç, banues në Velinaj, Shkodër; si dhe D. H., 42 vjeçe, banuese në Tiranë. Kjo shtetase u arrestua brenda disa orësh nga organizimi i operacionit policor ‘Vallas’, si rezultat i bashkëpunimit të mirëkoordinuar me strukturat e DVP Tiranë”, sqaroi Policia e Tiranës. Gjithashtu, janë shpallur në kërkim edhe shtetasit: A. S., 34 vjeç banues në Bajzë, Malësi e Madhe; A.
P., 38 vjeç, banues në Shirokë, Shkodër; S. B., 35 vjeç, banues në lagjen “Ahmet Haxhija”, Shkodër; B. L., 21 vjeç, banues në Alimetaj, Shkodër; E. S., 20 vjeç, banues në Shirokë, Shkodër; si dhe I. D., 26 vjeç, banues në Vallas, Shkodër; S. D., 34 vjeç, banues në Vallas, Shkodër; A. D., 29 vjeç, banues në Vallas, Shkodër (të afërm të njëri-tjetrit). KULTIVIMI I DROGËS
Nga veprimet hetimore të drejtuara nga Prokuroria pranë Gjykatës së Rrethit Gjyqësor Shkodër, rezulton se këta shtetas, në bashkëpunim me njëri-tjetrin, kryenin në fshatin Vallas, Shkodër, veprimtarinë e kundërligjshme të kultivimit të bimëve narkotike. Si rezultat i kontrollit në banesën e shtetasit të arrestuar Ardjan Tahiri, shërbimet e Policisë gjetën dhe sekuestruan në cilësinë e provës materiale, 246 kilogramë lëndë të dyshuar narkotike kanabis, një automjet dhe 11 aparate celularë, të cilat dyshohet se përdoreshin nga autorët për zhvillimin e kësaj veprimtarie kriminale. Gjithashtu, në vijim të kontrollit të imtësishëm të çdo pjese të territorit, në fshatin Vallas, Shkodër, u konstatuan dhe u asgjësuan me anë të djegies, nga ana e shërbimeve të Policisë, bimë të dyshuara narkotike kanabis, të kultivuara në afërsi të banesës së 28vjeçarit të arrestuar, Tahiri.