I dënuar me 21 vite, si fshihen turku në Pogradec
Vodhi miliona nga mashtrimi bankar, arrestohet 42-vjeçari
Një shtetas turk i shpallur në kërkim ndërkombëtar nga autoritetet e vendit të tij për akuzën e mashtrimit, u arrestua nga Policia në Pogradec. Njësia “Fast Albania” organizoi operacionit “Pojska”, duke çuar në pranga shtetasin Salih Akkurt, 42 vjeç, banues në Konja të Turqisë. Ai rezulton i dënuar me 21 vite burg, ndërsa i kanë mbetur për të kryer edhe 10 vite, pasi është shpallur fajtor për “Mashtrim të rëndë, duke përdorur sistemet informative të bankave dhe të kartave të kredit”. Policia e Shtetit tha se 42vjeçari nga Turqia ishte maskuar si fizioterapist, duke mashtruar qytetarët atje përmes ushtrimit të këtij profesioni, derisa u zbulua dhe u arrestua në shëtitoren “10 Dëshmorët e Pojskës”, vend nga ku edhe mori emrin operacioni. Arrestimi i 42-vjeçarit turk erdhi pasi shërbimet e “Fast Albania” kishin marrë informacion se një shtetas, i shumëkërkuar nga Turqia, fshihej në Pogradec, duke organizuat punën dhe pas disa ditë mbajtjeje nën kontroll, në bashkëpunim me Komisariatin
e Policisë Pogradec dhe Interpol Tiranën, bënë të mundur arrestimin e tij.
I KAPEN ÇEQE Policia e Shtetit tha se gjatë arrestimit, 42-vjeçarit i janë gjetur dhe sekuestruar edhe çeqe me shuma të mëdha financiare. “Ky shtetas ishte në kërkim ndërkombëtar, pasi Zyra Qendrore Kombëtare e Interpol Tiranës është njoftuar nga Interpol Ankara, Turqi, se për këtë shtetas, më datë 05.05.2022, është lëshuar urdhër-arresti nga Prokuroria e Izmirit, Turqi, në zbatim të vendimit nr. 2020/8992, të datës
30.12.2020, në bazë të të cilit, 42-vjeçari është dënuar me 21 vite, 10 muaj e 15 ditë burgim, nga të cilat i kanë mbetur për të vuajtur edhe 10 vite e 1 ditë burgim, për veprat penale ‘Mashtrimi i rëndë, duke përdorur sistemet informative, të bankave dhe kartave të kredit’ dhe ‘Largimi nga vendi i vuajtjes së dënimit’, të parashikuara nga legjislacioni turk. Gjatë kontrollit fizik të këtij shtetasi, shërbimet e Policisë gjetën dhe sekuestruan çeqe në shuma të mëdha monetare”, sqaroi Policia. Interpol Tirana, në bashkëpunim me Interpol Ankara, Turqi, dhe agjencitë ligjzbatuese, vijojnë procedurat për ekstradimin e këtij shtetasi drejt Turqisë.