Rusia paralajmëron Lituaninë anëtare të NATO-S për Kaliningradin
Lituania: Po zbatojmë vetëm sanksionet e Be-së përmes territorit tonë Kremlini: Bllokimi nga Lituania për mallrat e sanksionuara që kalojnë përmes enklavës ruse është joligjor
Rusia paralajmëroi dje Lituaninë, e cila është njëkohësisht edhe anëtare e NATO-S, se nëse tranziti i mallrave në enklavën ruse të Kaliningradit në detin Baltik nuk rivendoset me shpejtësi, atëherë Moska do të marrë masa për të mbrojtur interesat e saj kombëtare.
Ministria e Jashtme ruse thirri në takim ambasadorin lituanez në Moskë, ndërsa Kremlini u shpreh se situata ishte mjaft serioze. “Situata është tepër serioze”, deklaroi zëdhënësi për mediat i Kremlinit, Dmitry Peskov. “Ky vendim është i paprecedent. Është shkelje e çdo marrëveshjeje”. Të premten, më 17 qershor, autoritetet lituaneze i bënë të ditur rajonit rus të Kaliningradit se do të bllokonin importin dhe eksportin e një numri të madh mallrash që kalonin në rrugë hekurudhore, për shkak të sanksioneve perëndimore. Autoritetet lituaneze kanë ndaluar tranzitin e mallrave, si pjesë e sanksioneve të Be-së, në të gjithë territorin e saj, që përfshin të vetmen rrugë hekurudhore midis Rusisë kontinentale dhe enklavës së Kaliningradit në detin Baltik. Mallrat e ndaluara përfshijnë qymyrin, metalet, materialet e ndërtimit dhe teknologjinë e avancuar. Guvernatori i Kaliningradit ka vlerësuar se ndalimi mund të prekë deri në gjysmën e të gjitha mallrave që sillen në rajon me hekurudhë. Kaliningradi - shtëpia e flotës ruse të Baltikut dhe një vendvendosjeje për raketat me aftësi bërthamore “Iskander” është i vendosur në brigjet e Baltikut midis Lituanisë dhe
Polonisë, dy vende anëtare të NATO-S, dhe nuk ka kufi tokësor me Rusinë. Guvernatori i rajonit, Anton Alikhanov, tha të premten se bllokada do të prekë mes 40 për qind deri në 50 për qind të produkteve që importohen dhe eksportohen nga Rusia përmes Lituanisë. “Lituania nuk po bën asgjë të çuditshme në Kaliningrad dhe nuk është hera e parë që këto akuza vijnë nga Rusia. Sanksionet thjesht kanë hyrë në fuqi më 17 qershor dhe ne po i zbatojmë sipas udhëzimeve të Komisionit”, kështu deklaroi ministri i Jashtëm i Lituanisë, Gabrielius Landsbergis, në margjinat e këshillit të punëve të jashtme në Luksemburg, në lidhje me “bllokadën” e enklavës ruse. “Jo të gjitha mallrat janë prekur nga sanksionet, rreth 50 për qind janë në listën tonë të tranzitit”, tha ai.
Vendimi i Lituanisë është i fundit që merret nga një vend anëtar i Be-së për të sanksionuar Rusinë pas pushtimit të Ukrainës në shkurt. Në fund të majit, Bashkimi Europian ra dakord të ndalojë 90 për qind të importeve të naftës ruse deri në fund të vitit, krahas masave të tjera, thanë në atë kohë udhëheqësit e Këshillit Europian. “Marrëveshja për ndalimin e eksportit të naftës ruse në BE. Kjo mbulon menjëherë më shumë se 2/3 e importeve të naftës nga Rusia, duke reduktuar një burim të madh financimi për makinerinë e saj të luftës”, njoftoi Michel në një postim në “Twitter”. Ndërkohë, në Shtetet e Bashkuara, Shtëpia e Bardhë në fillim të qershorit njoftoi një raund tjetër sanksionesh financiare dhe diplomatike, që synojnë zyrtarët e qeverisë ruse dhe elitat pranë Presidentit rus, Vladimir Putin. Shtëpia e Bardhë tha në një deklaratë se sanksionet e fundit janë të dizajnuara “për të goditur evazionin dhe për të rritur presionin ndaj Putinit dhe financuesve të tij”.