Samiti i Be-së, Berisha: Kërcënim i dy gangsterëve

Ish-kryeministri Sali Berisha reagoi dje për komentin e Kryeministrit Edi Rama për pjesëmarrjen në Samitin e Bashkimit Evropian, që mbahet më 23 dhe 24 qershor në Bruksel. Sipas Berishës, ky është një qëndrim sinkron në Beograd e Tiranë, të cilët po kërcënojnë Ballkanin Perëndimor si dy gangsterë autokratë. Ish-kryeministri fton shqiptarët të ngrihen në këmbë për të mbrojtur orientimin dhe integrimin euroatlantik të tyre. “Aleanca pro Putin ne Ballkan reagon! Vuçiç dhe Rama kërcënojnë Be-në me mospjesmarrje në Samitin e Brukselit! Në një qëndrim sinkron në Beograd dhe Tiranë, Presidenti i Serbomadhisë, Aleksander Vuçiç, dhe vasali i tij, Edi Rama, kërcënojnë me mospjesëmarrje ne Samitin e liderëve të vendeve të Be-së, që do të mbahet në Bruksel, më datë 23 qershor dhe ku janë të ftuar edhe udhëheqësit e vendeve të Ballkanit Perëndimor. Ky kërcenim i dy gangsterëve autokratë të Ballkanit Perëndimor, Presidentit të serbomadhisë, Vuçiç, dhe vasalit të tij, Rama, duket si i urdhëruar nga Putin vetëm e vetëm për të shënuar kthesën e rajonit drejt projektit serbo-rus të Ballkanit të Hapur, me të cilin vendosen në rajon hegjemonizmi serb dhe influenca ruse. Dënoj me forcën më të madhe këtë qëndrim antikombëtar dhe anti-be pro serbo-rus të Edi Ramës dhe ftoj shqiptarët të ngrihen në këmbë për të mbrojtur orientimin dhe integrimin euroatlantik të tyre!”, shkruan Berisha. Edhe deputetja e Pd-së, Jorida Tabaku, reagoi dje për komentin e Kryeministrit Edi Rama në lidhje me pjesëmarrjen në Samitin e Bashkimit Europian që mbahet më 23 dhe 24 qershor në Bruksel. “Serbia nuk do të ulet si pasojë e kundërshtisë për sanksionet kundër Rusisë, RMV është duke u penguar nga problemet bilaterale me Bullgarinë, po Shqipëria përse refuzon BE? Kryeministri më autokrat në rajon, vendi më i korruptuar në Europë, nuk dëshiron integrimin në BE, ku kontrolli do jetë më i fortë. Po sikur ta ndërtojmë Be-në tonë këtu, pavarësisht një date e një procesi që sot edhe prej Ramës është larguar kaq shumë?”, shprehet Tabaku.