“Trafikantët shqiptarë kanë lidhje direkte me prodhuesit e drogave të forta”
Katër pikat ku mbështetet raporti, nga terrorizmi te shërbimet e huaja në rajon. Ja çfarë paralajmëron SHISH për Ballkanin
Shërbimi Informativ Shtetëror lajmëroi ditën e djeshme se me datë 24 qershor do të publikojë të plotë raportin vjetor të aktivitetit të vet për vitin që lamë pas.
Ky institucion publikoi në faqen e tij disa gjetje konkrete që lidhen me 4 pika kryesore të punës së tyre vjetore. Terrorizmi, krimi i organizuar, siguria në rajon dhe shërbimet e huaja në Ballkan u paraqitën në përmbledhjen e djeshme si problematika reale dhe me një shtrirje mjaft të gjerë. SHISH fakton dhe paralajmëron se terrorizmi, edhe pse nuk është i dukshëm viteve të fundit, si në vendin tonë, ashtu edhe në rajon, të prangosurit që gjenden në burgje, nuk e kanë pushuar aktivitetin, duke lajmëruar se ata mund të riaktivizohen nëse lihen të lirë. Një ndalesë konkrete në raportin e Shërbimeve Sekrete të vendit tonë iu merr edhe krimi i organizuar, kryesisht trafiku i drogës. Në fakt, SHISH ka vite që gjendet në ballë të informacioneve në lidhje me mbjelljen, përfshirjen e Policisë në kultivim dhe trafikim, si dhe në identifikimin e krerëve të grupeve kriminale që veprojnë në vendin tonë dhe jashtë. Por, kësaj radhe, ata janë ndaluar te trafikantët shqiptarë që kanë shkuar deri në origjinë të drogës, pra në vendet e Amerikës Latine, ku të paktën prej një viti gjithë policia e vendeve që prodhojnë dhe tregtojnë drogë janë në alarm prej tyre. Me mjaft interes për rajonin e Ballkanit në tërësi dhe vendin tonë në veçanti janë edhe dy pikat e fundit. Hartuesit e raportit kanë përdorur një gjuhë mjaft të kujdesshme dhe të kamufluar për të paraqitur problematikën konkrete që gjeneron e jo vetëm në fqinjësinë jo fort të mirë mes vendeve të rajonit, por madje edhe tendencën që kanë shërbimet e këtyre vendeve ndaj nesh, kryesisht në dy pika që ne, shqiptarët,
mburremi në arenë ndërkombëtare: çështja e ndëretnisë dhe ajo ndërfetare.
TERRORIZMI
Organizatat terroriste ISIS, “Al-qaida” dhe grupe të tjera, të frymëzuara nga ideologjia ekstremiste, vijojnë të mbeten kërcënim për sigurinë ndërkombëtare dhe rajonale. Gjatë vitit 2021, niveli i kërcënimit terrorist në vend ka qenë i ulët, ndërsa në rajon ka variuar nga i ulët në i mesëm, për shkak të synimeve apo planeve për akte terroriste.
Propaganda dhe teknologjitë e komunikimit online shfrytëzohen për aktivitete radikalizuese dhe rekrutuese. Grupet terroriste janë shpërndarë në platforma të tjera komunikimi për të decentralizuar edhe më tej propagandën dhe shpërndarjen e retorikës dhe ideologjisë së tyre. Lidhja e elementeve radikale me luftëtarët e huaj terroristë (LHT) apo organizata terroriste janë faktorë nxitës të aktivitetit të mundshëm terrorist. Gjithashtu, shtetas nga rajoni tashmë pjesë e diasporës ballkanike në vendet europiane, janë evidentuar e ndaluar për aktivitet terrorist, apo si propagandues e mbështetës të ideologjisë së organizatave terroriste.
Të burgosurit për terrorizëm vijojnë të mbajnë profil radikal dhe janë të angazhuar në aktivitete radikalizuese në sistemet penitenciare në vendin tonë dhe rajon. Vlerësohet se shkalla e radikalizimit mund të ndikojë në situatën e sigurisë, pas përfundimit të dënimeve.
KRIMI I ORGANIZUAR
Kundërvënia ndaj aktivitetit të grupeve kriminale në përgjithësi, dhe atyre të përfshira në trafikun e lëndëve narkotike në veçanti, është rritur ndjeshëm si brenda dhe jashtë vendit. Megjithatë, pavarësisht rezultateve domethënëse, kundërvënia ndaj trafikimit të lëndëve narkotike mbetet sfidë e rëndësishme, për shkak të evoluimit të mënyrave të operimit të tyre pas goditjeve.
Faktorë nxitës dhe tërheqës të aktivitetit kriminal në vend dhe rajon mbeten: anëtarët e tyre të pozicionuar tashmë në vendet e origjinës ku prodhohen lëndët narkotike; lidhjet me rrjete kriminale ndërkombëtare dhe rajonale; realizimi i kërkesave paraprake apo marrëveshjeve të shtyra në kohë për shkak të kufizimeve nga pandemia; mbulimi i kostove të shkaktuara nga sekuestrimet dhe arrestimet.
Grupet kriminale po bëhen përherë e më shumë heterogjene dhe po diversifikojnë fushat e veprimtarisë. Anëtarët e grupeve shqiptare të trafikut të drogës kanë krijuar kontakte të drejtpërdrejta edhe me prodhuesit direkt të drogave, duke fituar “besimin reciprok”.
GJENDJA E SIGURISË NË RAJON
Shqipëria ka mbështetur dhe vazhdon të mbështesë çdo përpjekje ndërkombëtare në favor të paqes dhe sigurisë rajonale e globale. Për më tepër, vendi ynë ndjek një politikë konstruktive rajonale, të mbështetur në parimet e bashkëpunimit, drejt proceseve integruese euroatlantike, fqinjësisë së mirë dhe
respektimit të të drejtave të pakicave.
Gjithsesi, qenia e Shqipërisë pjesë e Aleancës së NATO, pozicionimi i qartë pro-perëndimor, roli aktiv që luan në rajon e më gjerë, e kanë shndërruar në një objektiv të politikës së jashtme të aktorëve të tretë, të cilët synojnë destabilizimin e sigurisë rajonale, nëpërmjet cenimit të kohezionit social dhe etnik, instrumentalizimit të faktorëve nacionalistë në rajon, përdorimit të propagandës dhe dezinformacionit, rritjes së influencës malinje etj.
Mjedisi i sigurisë në Ballkanin Perëndimor vijon të karakterizohet nga zhvillime të brendshme politike të brishta, që tregojnë se rajoni mbetet i ekspozuar ndaj kërcënimeve dhe sfidave, që vijnë si për shkak të faktorëve të brendshëm (problemet social-ekonomike, tensionet ndëretnike e ndërfetare, korrupsioni, krimi i organizuar), ashtu dhe të ndikimit të aktorëve të jashtëm, të interesuar për ta mbajtur të pandryshuar ose për të përshkallëzuar gjendjen e sigurisë dhe atë politike në rajon.
INTELIGJENCA E HUAJ NË RAJON
Si vend anëtar i NATO-S, kontribuuese për paqen e sigurinë globale, por edhe aspirante
për t’u bërë pjesë e familjes së madhe europiane, Shqipëria vijon të mbetet në fokus të disa shërbimeve të huaja të inteligjencës.
Në qendër të aktivitetit të tyre për grumbullimin e informacionit vijojnë të mbeten zhvillimet e brendshme në fushën politike dhe të sigurisë, pozicionimi properëndimor i vendit tonë në raport me politikat në marrëdhëniet ndërkombëtare, marrëdhëniet me vendet e rajonit dhe aleatët strategjikë, stërvitjet ushtarake në kuadër të Aleancës dhe projektet në fushën e mbrojtjes.
Në vendet e tjera të rajonit, shërbimet jomiqësore të inteligjencës e kanë fokusuar aktivitetin në amplifikim të problematikave ndëretnike e ndërfetare, nxitjen dhe mbështetjen e faktorëve destabilizues të brendshëm, në ruajtjen e “status quo”-së në raport me proceset integruese dhe nxjerrjen e përfitimeve nga roli i saj në raport me Perëndimin.
Aktivitetet hibride të aktorëve joperëndimorë kanë njohur rritje në rajon, por edhe në vendin tonë, edhe pse jo me të njëjtat përmasa si në vendet e rajonit. Këto lloj aktivitetesh po bëhen më evidente, ndërkohë që vendet po përparojnë në proceset demokratizuese dhe integruese.
Grupet kriminale po bëhen përherë e më shumë heterogjene dhe po diversifikojnë fushat e veprimtarisë. Anëtarët e grupeve shqiptare të trafikut të drogës kanë krijuar kontakte të drejtpërdrejta edhe me prodhuesit direkt të drogave, duke fituar “besimin reciprok”.