Ligji për Butrintin, Meta: Kuvendi, jo votë symbyllur!
“Kuvendi duhet të miratojë dekretin për të ngritur një komision parlamentar” Presidenti u përgjigjet akuzave për lobim: Ky është sistem që do shkundet nga themeli duke nisur nga 25 korriku
Presidenti Ilir Meta i kërkoi Kuvendit të mos votojë symbyllur ligje të rëndësishme si ai për menaxhimin e Parkut Kombëtar të Butrintit, por të reflektojë dhe konsultohet me ekspertët për një zgjidhje më të mirë.
Në një konferencë për mediat, Meta përsëriti argumentet, me të cilat ai ktheu ligjin, ndërsa saktësoi se marrëveshja mes qeverisë dhe Fondacionit që do të menaxhojë Parkun Kombëtar të Butrintit për 10 vite nuk ishte transparente. Presidenti u shpreh se është e papranueshme logjika që shteti të heqë dorë nga çdo përgjegjësi dhe autorizon një fondacion të dedikuar dhe që nuk garanton dot rolin kontrollues sipas përgjegjësisë kushtetuese. Kreu i shtetit bëri të ditur se ligji bie ndesh me parimet kushtetuese, cenon interesin publik dhe shmang kontrollin apo auditimin nga autoriteti më i lartë kushtetues, që është KLSH. “Është e papranueshme që për një pasuri të tillë si Butrinti shteti të heqë dorë nga çdo përgjegjësi dhe autorizon një fondacion dhe vetë shteti është futur në një pozitë që nuk kontrollon dot rolin e vet. Për sa i takon procedurës së ndjekur për dhënin e titullit ‘Partner strategjik’, rezulton se është kryer nga Këshilli Kombëtar i Menaxhimit të Pasurive Natyrore, që nuk ka asnjë kompetencë. Asgjë e keqe nuk mund t’i vijë Kuvendit nga debati, oponenca dhe transparenca. Marrëveshja shmang kontrollin apo auditimin nga KLSH. Konstatoj se mekanizmat kushtetuese mes ekzekutivit dhe legjislativit, nuk kanë funksionuar. Marrëveshja e lidhur nuk garanton, krijon terren që të shkelen çështje të identitetit dhe trashëgimisë kombëtare. Kuvendi duhet të miratojë dekretin e Presidentit dhe kërkesën për të ngritur një Komision të Posaçëm Parlamentar. Presidenti nuk është kundër formave të bashkëpunimit shtet-privat, aq më tepër kur bëhet fjalë për Fondacionin Shqiptaroamerikan
për Zhvillim (AADF)”, tha Meta. I pyetur për hapat e mëtejshëm dhe nëse keni në plan ndonjë akt politik pas 24 korrikut nëse argumentet e tij nuk merren parasysh nga Parlamenti, Meta u shpreh se: “Qëndrimet e mia kanë qenë të qarta në mbrojtje të trashëgimisë kulturore dhe kombëtare, si çështja e teatrit dhe ajo që po diskutojmë. Dëshiroj që për një çështje kaq të rëndësishme, Kuvendi të mos votojë symbyllur, por t’i hapë sytë mirë. Nuk duhet të
paragjykoj vendimet e tij. Nuk kam shprehur ndonjë optimizëm mbresëlënës për sa i takon përgjegjshmërisë së maxhorancës. Apeloj që për një çështje të rëndësisë kaq të madhe, të ketë një reflektim”.
Padia në SPAK Presidenti Ilir Meta iu përgjigj interesimit të gazetarëve për kallëzimin penal që ka regjistruar SPAK pas denoncimit të ish-deputetit Halit Valteri, duke u shprehur se pretendimi për lobim nuk ka ekzistuar dhe ekziston. I pyetur nëse u druhet kallëzimeve të tjera, Meta u shpreh se pas 25 korrikut ky është një sistem që do shkundet nga themeli. Presidenti u shpreh se ata që janë në kërkim për aferën e inceneratorëve po bëjnë letrat për azil për t’i shpëtuar drejtësisë, ndërsa gazeta austriake do të marrë përgjigjen që meriton në seancat gjyqësore që do të zhvillohen atje. “Këto lajme absurde si vetë personazhet që i njihni të gjithë, nuk krijojnë asnjë shpërqendrim nga detyra e Presidentit deri në 24 korrik, por dhe nga angazhimet e zotit Ilir Meta duke nisur nga 25 korriku. Sa i takon gazetës austriake, do ta marrë përgjigjen atje, në seancat që do zhvillohen atje, kjo është një histori që as nuk ka ekzistuar, as nuk ekziston. Ata që janë në kërkim të letrave për azil për t’i shpëtuar drejtësisë këtu edhe të tjerë që janë këtu e vijojnë biznesin e inceneratorëve dhe biznese të vijojnë të bëjnë më të mirën e tyre. Ky është një sistem që do shkundet nga themeli duke nisur nga 25 korriku, por deri në 24 korrik do bëjmë detyrën me përgjegjshmëri të plotë e shpresojmë të ketë dhe reflektime kur bëhet fjala për çështje të interesit kombëtar”, tha Meta.