BALLA: DO RRËZOJMË DEKRETIN E METËS

Kreu i Grupit të Ps-së, Taulant Balla, deklaroi se maxhoranca do ta rrëzojë dekretin e Presidentit, që riktheu për shqyrtim në Kuvend ligjin për menaxhimin e Butrintit. Në një dalje për mediat, Balla tha se marrëveshja do t’i shërbejë Butrintit. “Pjesa që lidhet me dekretin e Presidentit të republikës që lidhet me rikthimin për rishqyrtim në Kuvend të marrëveshjes për Butrintin. Unë dua t’ju konfirmoj atë që e kemi thënë. Nuk kishin asgjë të re nga fronti opozitar, ku përfshihet edhe Presidenca. Ne thanë që në momentin kur kjo marrëveshje po shqyrtohej që ne do ta rrëzojmë dekretin e Presidentit në largim, dhe sapo Kuvendi të njihet me dekretin, ai do të rrëzohet në mënyrë që marrëveshja të hyjë në fuqi për një miradministrim sipas një modeli tashmë të konsoliduar të Fondit Shqiptaro-amerikan të Zhvillimit. Se këta po dëgjuan fjalën “Amerikan” brenda, bëhen bashkë të gjithë dhe dalin kundër. E vërteta është që ajo është një marrëveshje e shkëlqyer që do të japë kësaj pasurie të madhe kombëtare, që është Parku Arkeologjik i Butrintit, një zhvillim dhe akses më të mirë të turistëve jo vetëm shqiptarë, por edhe të huaj”, tha Balla.