Dalin rezultatet e para të maturës, vetëm 611 ekselentë në gjuhën e huaj
Ministrja Kushi: Një pjesë shkëlqyen, optimiste për provimet e tjera S’ka më dhjeta me mijëra, megjithëse dominojnë nëntat dhe dhjetat. Mesatarja e gjithë maturantëve 7.7, ndërsa kalueshmëria ulet në 97%
Dymbëdhjetë ditë pasi zhvilluan provimin e parë me detyrim, maturantët u njohën me rezultatin e Gjuhës së huaj.
Rezultatet në përgjithësi ishin të kënaqshme, por ashtu si në çdo provim, për disa maturantë nota ishte e pritshme, ndërsa për të tjerë, mundi i tri viteve mësim, i shkuar dëm. Ishte ministrja e Arsimit, Evis Kushi, që bëri publik linkun me rezultatet, sipas saj, optimiste. “I prita me padurim rezultatet e para të maturantëve tanë në provimin e Gjuhës së huaj të Maturës Shtetërore dhe gëzohem që një pjesë e mirë e tyre kanë shkëlqyer me nota maksimale. Jam optimiste edhe për provimet e tjera”, shprehet ministrja duke iu uruar maturantëve suksese në vijim.
REZULTATET
Që maturantët dalin gjithnjë më mirë në gjuhën e huaj se atë shqipe, nuk ka më diskutim, por këtë vit, ndryshe nga të tjerat, ku dhjetat numëroheshin me mijëra, tanimë janë me qindra. Nga afro 30 mijë maturantë pjesëmarrës, vetëm 611 kanë arritur të marrin pikët maksimale, duke u vlerësuar me notën 10.00. Jo në terma absolutë, por ka edhe të tjerë që rrëmbyen “me paterica” notën maksimale, por në përllogaritjen që do t’iu bëhet për garën në universitet, nuk iu vlen, pasi merret me presje dhjetore.
Në total, gati gjysma e të rinjve pjesëmarrës në test kanë marrë nota të larta, duke u vlerësuar me 8-10. Një fenomen i ngjashëm ka ndodhur edhe vitin e kaluar në të njëjtën lëndë, ku 48.4% e të gjithë notave i përkisnin këtij brezi. Mesatarja totale e përllogaritur është relativisht e lartë, 7.72, por nota më e shpeshtë midis të rinjve është midis 9-10. Plot 8781 maturantë rezultojnë të jenë vlerësuar në këtë hark.
Sa u takon mbetësve, ato numërohen plot 611 maturantë, duke e ulur pragun e kalueshmërisë në 97.11%, nga 98.2% që ishte vitin e shkuar. PESHA E PROVIMEVE
Pas dy ditësh, në 24 qershor, maturantët i nënshtrohen
provimit të fundit të Maturës Shtetërore, i cili është me zgjedhje dhe zakonisht futen vetëm ata që synojnë shkollën e lartë. Notat e tri provimeve me detyrim dhe ai me zgjedhje bashkë me ato të tri viteve gjimnaz do të përcaktojnë në njëfarë mënyre edhe fituesit në universitete. Këta të fundit kanë formulat e tyre të përllogaritjes së pikëve, duke u dhënë peshë të ndryshme
lëndëve të caktuara, detyrimisht me lidhje të drejtpërdrejtë me degën ku aplikojnë. Me përfundimin e provimeve dhe marrjen e të gjitha rezultateve, notat hidhen në sistem duke ia përcjellë Qendrës së Shërbimeve Arsimore, e cila pasi merr preferencat e kandidatëve për studentë (me Formularin A2) ua nis universiteteve për të përzgjedhur më të mirët.