Përfundimi i luftës “varet nga vëmendja e botës”, thotë Zelensky
Çdo gjë është në flakë, rajoni lindor i Ukrainës nën bombardime të vazhdueshme Zyrtari ukrainas: Forcat ruse që sulmojnë qytetin e Severodonetsk kanë armë të mjaftueshme për të nisur një ofensivë të gjerë
Presidenti ukrainas, Volodymyr Zelensky, u ka kërkuar profesionistëve të filmit krijues që të bëjnë më shumë për të “promovuar trimërinë ukrainase”, gjatë një fjalim në Festivalin Ndërkombëtar Cannes për industrinë krijuese.
“Përfundimi i kësaj lufte dhe rrethanat e saj varen nga vëmendja e botës. Dhe kjo është arsyeja pse unë kam nevojë për aleatë. Ne kemi nevojë për njerëz si ju”,- tha Zelensky në një deklaratë përmes video të martën. “Unë besoj se fuqia e krijimtarisë njerëzore është më e madhe se fuqia e një shteti bërthamor që ka ngecur në të kaluarën”, tha Zelensky. “Flisni për Ukrainën. Mos lejoni që bota ta zhvendosë vëmendjen në diçka tjetër”. Në 117 ditët e luftës së Rusisë në Ukrainë, Zelensky ka mbajtur më shumë se 70 fjalime në mbarë botën, duke përfshirë në parlamente, institucione ndërkombëtare dhe forume biznesi. Ndërkohë që në terren trupat ruse kanë kapur fshatin e vijës së parë të Toshkivka në rajonin e Donbasit, ndërsa po përpiqen të kapin qytetin strategjik të Severodonetskut. Kreu i administratës ushtarake të distriktit Severodonetsk, Roman Vlasenko, i tha CNN të martën se fshati nuk ishte nën kontrollin e Ukrainës që nga e hëna. Në qytetin e Severodonetskut, një nga pikat më të nxehta të luftimeve, trupat ukrainase kanë arritur të rezistojnë në fabrikën e lëndëve kimike azot, ku janë duke u strehuar edhe qindra civilë. Sipas guvernatorit Serhiy Haidiai, forcat ruse po e shndërrojnë zonën “në rrënoja”. Gjithashtu, zyrtarët ukrainas kanë raportuar një rritje të bombardimeve ruse rreth qytetit verilindor të Kharkivit në 24 orët e fundit, ndërsa evakuimi i njerëzve nga territoret e pushtuara nga forcat ruse vazhdoi. “Brenda 24 orëve, pushtuesit qëlluan në rajonet Kyivsky, Industrial, Saltivsky dhe Nemyshlyansky të Kharkiv”, tha kreu i administratës ushtarake të rajonit Kharkiv, Oleh Syniehubov, në kanalin e tij zyrtar “Telegram”. Si rezultat i sulmeve ruse gjatë natës, ndërtesa e një prej institucioneve arsimore në rrethin Kyivsky të Kharkiv u dëmtua ndjeshëm. Sipas Syniehubov, tre civilë janë vrarë dhe shtatë janë plagosur në 24 orët e fundit. Në linjën e kontaktit, forcat ukrainase kanë zmbrapsur sulmet në zonën përreth Izium, ndërsa Rusia vazhdoi të mbajë një qëndrim mbrojtës rreth Kharkiv, duke u përpjekur të parandalojë një përparim ukrainas, shtoi Syniehubov. Luftimet pasuan pasi 993 njerëz, përfshirë 254 fëmijë, u evakuuan nga territoret e pushtuara përkohësisht në rajonin e
Kharkiv, sipas Syniehubov. Më shumë se 30 autobusë për në qytetet Chuhuiv dhe Kharkiv u përdorën për evakuim. Ushtria ukrainase tha të martën se kishte nisur disa sulme ajrore mbi ishullin e Zmiinyi, i cili njihet edhe si ishulli i Gjarprit. Komanda Operacionale Jugore e Ushtrisë së Ukrainës tha se kishte përdorur “sulme të shenjëstruara me përdorimin e forcave të ndryshme” në ishull. Operacioni ushtarak është ende në vazhdim dhe se “heshtja për mosdhënie informacion” ishte e nevojshme deri në fund të operacionit, shtoi komanda. Ishulli Zmiinyi ishte skena e një prej ngjarjeve të para të rëndësishme të luftës në Ukrainë dhe është me rëndësi strategjike për të dyja palët. Gjatë ditëve të fillimit të luftës, ishte vendi nga ku një anije luftarake ruse u kërkoi mbrojtësve ukrainas për t’u dorëzuar. Ata u përgjigjën, me frazën e famshme “anija luftarake ruse, shko q .... ”, një frazë që u bë motiv i rezistencës ukrainase.