Rusia kërcënon vendin anëtar të NATO-S BE: Transiti tokësor mes Kaliningradit dhe Rusisë nuk është ndaluar

Shefi i sigurisë së Rusisë deklaroi të martën se Moska do t’i përgjigjet vendimit të Lituanisë për të ndaluar transitin hekurudhor të mallrave të caktuara nga Rusia drejt enklavës ruse të Detit Baltik dhe se kjo kundërpërgjigje do të ketë “një impakt tejet negativ” në popullsinë e Lituanisë, duke rritur edhe më tej tensionet në rajon. Nikolai Patrushev, sekretari i Këshillit të Sigurisë në Kremlin, vizitoi të martën Kliningradin dhe u zotua se do të merreshin masa ndaj bllokadës. Të premten, më 17 qershor, autoritetet lituaneze i bënë të ditur rajonit rus të Kaliningradit se do të bllokonin importin dhe eksportin e një numri të madh mallrash që kalonin në rrugë hekurudhore për shkak të sanksioneve perëndimore. Kaliningradi është i vendosur në brigjet e Balltikut midis Lituanisë dhe Polonisë, të dyja anëtarë të NATO-S, por nuk ka kufij tokësorë me Rusinë. “Rusia do t’u përgjigjet këtyre veprimeve armiqësore”, deklaroi Patrushev për mediat ruse. “Masat përkatëse janë duke u hartuar në një format ndërveprues dhe do të miratohen së shpejti. Pasojat e tyre do të kenë një ndikim negativ në popullatën e Lituanisë”, tha Patrushev, pa dhënë detaje se cilat mund të jenë masat që Rusia do të marrë. Ndërsa qeveria lituaneze theksoi të martën, në një deklaratë me shkrim, se “transiti i pasagjerëve dhe mallrave të pasanksionuara drejt dhe nga rajoni i Kaliningradit përmes Lituanisë vazhdon pa ndërprerje” dhe se ndalimi i transitit të mallrave të sanksionuara ishte thjesht pjesë e paketës së katërt të sanksioneve të Be-së kundër Rusisë.