Ukraina arreston zyrtarë të lartë të dyshuar për spiunazh Spiunët merrnin deri në 15,000 USD për çdo informacion

Ukraina ka arrestuar një zyrtar të lartë qeveritar dhe një drejtues biznesi të dyshuar si pjesë e një rrjeti për llogari të spiunazhit rus, tha të martën Shërbimi i Sigurisë së Ukrainës. Shërbimi i Sigurisë (SBU) i identifikoi si një zyrtar të lartë në Sekretariatin e Kabinetit të Ministrave dhe një shef departamenti në Dhomën e Tregtisë dhe Industrisë. Përmes një deklaratë në aplikacionin “Telegram”, zyrtarët ukrainas thanë se kishin kryer një “operacion special me shumë faza” për të neutralizuar rrjetin e dyshuar të spiunazhit. “Këta zyrtarë i kalonin armikut informacione të ndryshme të inteligjencës: nga gjendja e aftësive tona të mbrojtjes deri te zhvendosjet e trupave në kufirin shtetëror dhe të dhënat personale të oficerëve ukrainas të zbatimit të ligjit”. Rusia nuk komentoi menjëherë deklaratën e bërë nga SBU. Dy të dyshuarit kryesorë u shfaqën të ulur përballë një flamuri ukrainas në një video dhe thanë se kishin bashkëpunuar me Moskën, me të cilën Ukraina ka qenë në luftë që kur Rusia filloi pushtimin e fqinjit të saj, më 24 shkurt. Nuk ishte menjëherë e qartë nëse ata folën si rezultat i të ndodhurit nën presion. SBU tha se Rusia i pagoi të dyshuarit nga 2,000 deri në 15,000 dollarë USD për çdo informacion, në varësi të nivelit të sekretit dhe rëndësisë së informacionit. Një nga burrat tha në video se kishte marrë gjithsej 33,000 dollarë për aktivitetet e tij dhe tjetri tha se kishte marrë 27,000 dollarë. Njëri, i cili kishte emrin e koduar “Kireev”, tha se kishte bashkëpunuar që nga viti 2016, ndërsa tjetri tha se e kishte bërë këtë mision që nga viti 2019. Vetëm 5 ditë më parë, autoritetet holandeze thanë se kanë penguar një spiun rus që paraqitej si praktikant brazilian, të depërtojë në Gjykatën Penale Ndërkombëtare, (ICC) ndërsa ajo heton krimet e luftës që dyshohet se janë kryer nga trupat në Ukrainë. Shërbimi i Përgjithshëm i Inteligjencës dhe Sigurisë së Holandës (AIVD) tha se i dyshuari, i identifikuar si Sergei Vladimirovich Cherkasov, erdhi në Holandë në prill duke përdorur një histori mashtrimi. Sipas AIVD, 36vjeçari është një agjent i inteligjencës ushtarake të Rusisë dhe përdori një identitet të rremë duke u paraqitur si shtetas brazilian. Në deklaratë thuhej gjithashtu se Cherkasov u deportua menjëherë në Brazil pas mbërritjes së tij, ku u arrestua me akuzën e mashtrimit të identitetit.