Vendimi, shkarkohet drejtori i Parandalimittëpastrimittëparave
Nën drejtimin e Koçit, vendi në listën “gri”, me rrezik të lartë për pastrimin e parave Elvis Koçi mbante këtë detyrë prej më shumë se 3 vitesh. Në vend të tij është emëruar Iris Ago
Shkarkohet nga detyra drejtori i Përgjithshëm i Parandalimit të Pastrimit të Parave, Elvis Koçi, dhe në vend të tij është emëruar Iris Ago. Vendimi është marrë në mbledhjen e djeshme të qeverisë.
Koçi mbante postin e drejtorit prej më shumë se tre vitesh. Ai u emërua në kohën kur në krye të Ministrisë së Financave ishte Anila Denaj. Por, gjatë drejtimit të tij nuk është shënuar asnjë progres në drejtim të parandalimit të pastrimit e parave. Shqipëria vijon të jetë pjesë e listës ‘gri’ apo e vendeve me rrezik të lartë. Kjo vihet në dukje në raportin e hartuar për vitin 2021 nga MONEYVAL, pjesë e Këshillit të Evropës, ku theksohet se vendi nuk ka shënuar asnjë përmirësim, duke neglizhuar përmbushjen e rekomandimeve të vëna nga Task Forca për Veprim (FATF). Për pasojë, thuhej në dokument do të vijojë të jetë nën lupën e Komitetit të Ekspertëve për Vlerësimin e Masave kundër Pastrimit të Parave dhe Financimit të Terrorizimit. Rezultatet e raportit të MONEYVAL, përveçse nxjerrin në pah papërgjegjshmërinë e autoriteteve për të reaguar, dëmtojnë biznesin dhe çfarë është edhe më e rëndësishme minojnë besueshmërinë e vendit drejt procesit të integrimit në Bashkimin Evropian. Shqipëria u përfshi sërish në listën gri, apo thënë ndryshe u klasifikua në radhën e vendeve me rrezik të lartë në pastrimin e parave në 2020, pasi kishte arritur ta fitonte këtë betejë në 2015. “Shqipëria është vlerësuar nga Moneyval, duke marrë rezultat të mirë në anën teknike, por jo për sistemin. Mori vlerësim pozitiv në kornizën ligjore. Ndryshimet ligjore që ka marrë,
kanë adresuar mangësitë teknike. Në raportin e fundit, Shqipëria ka shënuar progres në 6 rekomandime”, tha asokohe drejtori i Drejtorisë së Parandalimit të Pastrimit të Parave, Elvis Koçi. Vendi është në monitorim prej më shumë se një dekadë dhe përgjatë kësaj periudhe ecuria ka qenë me ulje e ngritje, duke e bërë edhe më të vështirë “shfarosjen” e këtij fenomeni.
EMËRIMI
Në krye të këtij institucioni mjaft të rëndësishëm është
vendosur Iris Ago. Kjo e fundit ka shërbyer si këshilltare e Ministres së Financave, Delina Ibrahimaj, prej 2011-s. Më herët ajo ka mbajtur pozicionin drejtor në Drejtorinë e Tatimpaguesve të Mëdhenj nga ndërsa gjatë periudhës 2017- 2020 ka drejtuar Drejtorinë e Kontrollit Tatimor, pranë Drejtorisë së Përgjithshme të Tatimeve. Ago ka përvojë dhe ekspertizë në fushën e konsulencës financiare; tatimore dhe kontabilitetit për kompanitë të sektorëve të ndryshëm; këshillim për fondet e investimeve; planifikim marketingu; studime fizibilitetiti; studim tregu; plan biznesi; konsultim për marrëdhëniet e shoqërisë me institucionet financiare për kreditim ose financim; konsultim për marrëdhëniet e kompanisë me sektorin publik. Pjesë e rëndësishme e detyrave gjatë përvojës në sektorin privat ka qenë dhe angazhimi në disa projekte strategjike, si ai i gazsjellësit TAP. Është trajnuar mbi Standardet Kombëtare dhe Ndërkombëtare të Kontabilitetit (SKK & IFRS), Sfidat e Lidershipit në Shqipëri organizuar nga Universiteti “George Washington”, si dhe ka kontribuar në programin e “Doing Business” për vite me radhë.